قايتارىلعان اكتيۆتەر بيىل قانشا تابىس اكەلدى
الماتى. قازاقپارات - 2025 -جىلدىڭ باسىنان بەرى اۋكسيوندار ارقىلى 32 قايتارىلعان اكتيۆ ساتىلعان.
«قايتارىلعان اكتيۆتەردى باسقارۋ كومپانياسىنىڭ» مالىمەتىنە سايكەس، بيىل زەرگەرلىك بۇيىمدار، ەليتالىق قولساعاتتار، كوللەكتسيالىق مونەتالار جانە جىلجىمايتىن مۇلىك نىسانى ەسەبىنەن 198505235 تەڭگە قارجى تۇسكەن.
اۋكسيوندا ەڭ باعالى اكتيۆ استانا قالاسىندا ورنالاسقان ءۇي- جاي بولعان. ول 96 ميلليون تەڭگەگە ساتىلدى. ودان بولەك:
Patek Philippe World Time Chronograph Green Mecca Edition قولساعاتى - 36270976 تەڭگە؛
Cartier Ballon Bleu Tourbillon قولساعاتى - 17710344 تەڭگە؛
Chopard Imperiale قولساعاتى - 4819512 تەڭگە؛
Breguet 882U № 3271 ساعاتى - 8822779 تەڭگە؛
Ulysse Nardin Executive Skeleton Tourbillon ساعاتى - 5959911 تەڭگە؛
Chopard القاسى - 2362688 تەڭگە؛
Cartier LOVE بىلەزىك پەن جۇزىك - 2619282 تەڭگە؛
Blancpain Villeret Ultraplate قولساعاتى - 2975401 تەڭگە؛
باسقا زەرگەرلىك بۇيىمدار، سىرعالار، جۇزىكتەر، بىلەزىكتەر مەن كوللەكتسيالىق مونەتالار - 19 ميلليون تەڭگە.
- بارلىق اۋكسيوندار E-Qazyna ۆەب-پلاتفورماسىندا ەلەكتروندى فورماتتا وتكىزىلدى جانە اشىقتىق پەن جاريالىلىق پرينسيپتەرى قاتاڭ ساقتالدى، - دەلىنگەن كومپانيا جاۋابىندا.
قازىرگى ۋاقىتتا «قايتارىلعان اكتيۆتەردى باسقارۋ كومپانياسى» باسقارۋىندا زەرگەرلىك بۇيىمداردى قوسپاعاندا جالپى قۇنى 48,6 ميلليارد تەڭگە بولاتىن 37 اكتيۆ بار. ونىڭ ىشىنە قۇنى 12,5 ميلليارد تەڭگە بولاتىن الماتى قالاسىنداعى 6 جەر ۋچاسكەسى كىرەدى.
- جاقىن ارادا 164 دانا زەرگەرلىك بۇيىم جانە الماتى قالاسىنداعى «كوكتەم-2» ىقشام اۋدانى، 22-مەكەنجايىنداعى جىلجىمايتىن مۇلىك ساتۋعا قويىلادى. سونداي-اق اۋكسيونعا الماتى وبلىسىنداعى 15 جەر ۋچاسكەسى شىعارىلدى. اۋكسيوندار 2025 -جىلعى 22-شىلدە مەن 31-شىلدە ارالىعىندا ءوتىپ جاتىر، - دەپ حابارلادى كومپانيادان.
اۋكتسيوننان تۇسكەن بارلىق قاراجات ارنايى مەملەكەتتىك قورعا اۋدارىلادى. قازىرگە دەيىن قورعا 25,4 ميليارد تەڭگە تۇسكەن. ونىڭ ىشىندە: 24,6 ميلليارد تەڭگە - اكتيۆتەردى ساتۋدان، 800 ميلليون تەڭگە - جالداۋ، ديۆيدەندتەر جانە سەنىمگەرلىك باسقارۋدان تۇسكەن كىرىستەر.
ەسكە سالايىق، «قايتارىلعان اكتيۆتەردى باسقارۋ كومپانياسى» 2023 -جىلعى 21-قىركۇيەكتە قۇرىلعان. تولىقتاي مەملەكەت مەنشىگىنە تيەسىلى كومپانيا مەملەكەتكە قايتارىلعان اكتيۆتەردى قابىلداپ، اكتيۆتەر ساتىلعانعا دەيىن ولاردى جالعا بەرۋ، سەنىمگەرلىك باسقارۋ، ءوز بەتىمەن باسقارۋ ارقىلى ۇزدىكسىز جۇمىس ىستەۋىن قامتاماسىز ەتەدى.
