قاۋىپسىز جول اكسياسى: ايىپتۇراققا 9 مىڭنان استام كولىك جەتكىزىلدى

استانا. KAZINFORM - ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ «قاۋىپسىز جول» اكسياسىنىڭ قورىتىندىسىن جاريالادى.

«بىلتىر ەلىمىزدىڭ جولدارىندا 2,5 مىڭنان استام ادام قازا تاۋىپ، 20 مىڭعا جۋىق ادام جارالاندى. جولداعى ەرەجە بۇزۋ ارەكەتتەرىنىڭ، سونداي-اق جول اپاتىنىڭ الدىن الۋ بويىنشا شارالار بەلسەندى تۇردە اتقارىلىپ جاتىر. ونىڭ ىشىندە رەسپۋبليكا اۋماعىندا «قاۋىپسىز جول» جەدەل-پروفيلاكتيكالىق ءىس-شاراسى ۇيىمداستىرىلدى. اكسيانى وتكىزۋگە 9,5 مىڭ پوليسيا قىزمەتكەرى مەن باسقا دا مەملەكەتتىك ورگانداردىڭ مىڭعا جۋىق وكىلى جۇمىلدىرىلدى»، - دەدى ش. الەكەشيەۆ مينيسترلىكتىڭ اپتالىق بريفينگىندە.

ونىڭ ايتۋىنشا، جولداعى ەرەجەنى بۇزعانى ءۇشىن 360 مىڭنان استام ادام اكىمشىلىك جاۋاپكەرشىلىككە تارتىلدى. پاترۋلدىك كولىكتەرگە ورناتىلعان اۆتوماتتاندىرىلعان قۇرىلعىلار ارقىلى جىلدامدىقتى شەكتەن اسىرۋدىڭ 87 مىڭنان استام دەرەگى انىقتالدى. ايىپتۇراققا 9 مىڭنان استام كولىك جەتكىزىلگەن.

«جول-كولىك وقيعالارىنا جانە ولاردىڭ زارداپتارىنىڭ اۋىرلىعىنا اسەر ەتەتىن سەبەپتەردىڭ ءبىرى -جولداردىڭ جاعدايى. سوندىقتان وپەراتسيا اياسىندا پوليسەيلەر ەل بويىنشا 8 مىڭ زەرتتەۋ جاسادى. جول قاۋىپسىزدىگىنە كەرى اسەر ەتەتىن 23 مىڭنان استام كەمشىلىك انىقتالدى. ولاردى جويۋ تۋرالى ءتيىستى قىزمەتتەرگە 8 مىڭعا جۋىق نۇسقاۋ بەرىلگەن. جولداردى كۇتىپ ۇستاۋعا جاۋاپتى 1179 ادام اكىمشىلىك جاۋاپكەرشىلىككە تارتىلدى»، - دەدى رەسمي وكىل.

ايتا كەتەيىك، «قاۋىپسىز جول» اكسياسى 5-29-اقپان ارالىعىنداعى ءوتتى.