«قايراتتىڭ» كورولدىك كلۋبقا قاۋقارى جەتە مە

استانا. قازاقپارات - Kazinform ءتىلشىسى بۇگىن كەشكە الماتىدا وتەتىن قازاقستاندىق «قايرات» پەن يسپانيانىڭ «رەال مادريد» فۋتبول كوماندالارىنىڭ كەزدەسۋى تۋرالى ساراپشىلار، جۋرناليستەر جانە جانكۇيەرلەردىڭ پىكىرىن وقىرمان نازارىنا ۇسىنادى.

جۇلدىزدار جاۋعان كۇن

الماتىلىق «قايرات» بيىل ءدۇبىرلى دودانى ءبىرىنشى ىرىكتەۋ كەزەڭىنەن باستاعان ەدى. ادەتتە، مۇنداي ىرىكتەۋ ساتىسىنان نەگىزگى كەزەڭگە دەيىن جەتۋ قيىنعا سوعادى. قازاقستاندىق كوماندا ەشبىر ىركىلگەن جوق. جارىستىڭ ءار ساتىسىندا جانكۇيەرلەرگە ەرەكشە قۋانىش سىيلادى. الدىمەن سلوۆەنيانىڭ «وليمپياسىن» قاپى قالدىرعان كلۋب ودان كەيىن فينليانديانىڭ كۋپس، سلوۆاكيانىڭ «سلوۆان» كلۋبىن ارتقا تاستادى. پلەي-وفف ساتىسىندا شوتلانديانىڭ «سەلتيگىن» جەڭگەن ولار نەگىزگى كەزەڭگە جولداما الدى. العاشقى تۋردا الماتىلىق كلۋب سىرت الاڭدا «سپورتينگ» (پورتۋگاليا) كومانداسىنا 1:4 ەسەبىمەن جول بەردى. ەندى «رەال مادريد» (يسپانيا)، «ينتەر» (يتاليا)، «ارسەنال» (انگليا)، «بريۋگگە» (بەلگيا)، «وليمپياكوس» (گرەكيا)، «پافوس» (كيپر)، «كوپەنگاگەن» (دانيا) سەكىلدى كلۋبتارمەن شەبەرلىك بايقاسادى.

- مادريدتىك كلۋبتىڭ شابۋىلشىلارى قاي كوماندانىڭ دا قورعانىسىن ابىگەرگە سالادى. وندا ۆينيسيۋس جۋنيور، كيليان مباپپە، گونسالو گارسيا، برايم دياس، اردا گيۋلەر سەكىلدى تاجىريبەلى ويىنشىلار بار. مەنىڭ ويىمشا، شابۋىل شەبىندەگى بارلىق فۋتبولشى وتە مىقتى. ءتىپتى كورولدىك كلۋبتاعى بارلىعىن ايرىقشا اتاپ وتۋگە بولادى. بارلىعى قاقپاعا قاۋىپ توندىرە الادى. ءبىز يسپانيالىق كلۋبتىڭ سوڭعى بەس كەزدەسۋىن قاراپ شىقتىق. سونداي-اق قۇرلىقتىق كۋبوكتاعى پ س ج كلۋبىمەن ويىنىندا نازاردا ۇستادىق. «رەال مادريد» تۇراقتىلىعىمەن ەرەكشەلەنەدى. دەگەنمەن جەڭىلىستەن ەشقانداي كوماندا قاشىپ قۇتىلا المايدى. جاس قاقپاشىمىز شەرحان قالمىرزا پورتۋگاليانىڭ «سپورتينگىمەن» كەزدەسۋدە ءوزىن جاقسى قىرىنان تانىتتى. ەشقانداي قوبالجۋدى بايقاعان جوقپىن. ونىڭ دايىندىعىن قاقپاشىلار باپكەرى يليا يۋروۆ جاقسى بىلەدى. الداعى ويىندا وعان ارىپتەستەرى كومەكتەسەدى دەگەن سەنىمدەمىن. ول وزىنە جۇكتەلگەن جاۋاپكەرشىلىكتى سەزىنەدى. ءاربىر كوماندانىڭ كەمشىن تۇسى بولادى. كەزدەسۋ الدىندا ءار قارسىلاستىڭ وسىنداي وسال تۇسى زەرتتەلەدى. ءبىز اتاقتى كلۋبپەن كەزدەسۋدە وسىنداي وسال تۇسىن تابۋعا تىرىسامىز. ونى ەرتەڭگى ويىن بارىسىنان كورەسىزدەر. ويىمىز جۇزەگە اسا ما؟ بۇل ساۋالدىڭ جاۋابى كەزدەسۋدەن كەيىن بەلگىلى بولادى، - دەدى باس باپكەر باسپا ءسوز ءماسليحاتىندا.

ال الماتىلىق كلۋب بولسا، قارسىلاسىنىڭ اتاق-ابىرويىنا قاراماستان جاقسى ويىن كورسەتۋگە كۇش سالاتىنىن ايتادى.

الماتىلىق كومانداعا ءۇمىت ارتامىز

فۋتبولدا جانكۇيەرلەر كۇتپەگەن ەسەپ تىركەلىپ جاتادى. بۇل كەزدەسۋدە «قايرات» سەنساتسيا جاساي الا ما؟ وعان كورولدىك كلۋب مۇمكىندىك بەرە مە؟ شىندىعىندا، الەمنىڭ كوپتەگەن مىقتى فۋتبولشىسىن قاتارىنا قوسقان «رەال مادريد» ۇپاي جوعالتىپ جاتسا، ول فۋتبول الەمىندە ەرەكشە وقيعا رەتىندە باعالاناتىنى داۋسىز.

سپورت كوممەنتاتورى باقداۋلەت ەرعالي الداعى كەزدەسۋدىڭ كورولدىك كلۋب ءۇشىن ەرەكشە ەكەنىن ايتادى. ويتكەنى ولار يسپانيا پريمەراسىندا «اتلەتيكو مادريدتەن» ءىرى ەسەپپەن جەڭىلىپ قالدى.

- بۇل ساتسىزدىگىن «رەال مادريد» ەندى جانكۇيەرلەرىنىڭ الدىندا چەمپيوندار ليگاسىنداعى «قايراتپەن» كەزدەسۋدە «اقتاپ الۋعا» تىرىسادى. ارينە، ولار ءوز جانكۇيەرلەرىن قۋانتۋ ءۇشىن بارىن سالادى. كوپ گول سوققى جاساۋعا ۇمتىلادى. سول ءۇشىن نەگىزى قۇرامىن الىپ كەلدى. باس باپكەر حاۆي الونسو ءبىرىنشى جانە ەكىنشى قۇرام اراسىنداعى ويىنشىلارمەن عانا روتاتسيا جاسايدى. كەزدەسۋ بارىسىندا ولار ءىرى ەسەپپەن جەڭۋگە تىرىسادى دەگەن ويدامىن. وعان «قايرات» فۋتبولشىلارى مۇمكىندىك بەرمەيدى. ودان بولەك «قايرات» سىندى كوماندالارعا قارسى كيليان مباپپە، ۆينيسيۋس جۋنيور سياقتى «التىن دوپ» نەمەسە جەكە ماراپاتقا تالاساتىن ويىنشىلار كوبىرەك گول سوعىپ، جەكە ستاتيستيكاسىن جاقسارتىپ العىسى كەلەدى. دەگەنمەن «رەال مادريدتىڭ» قورعانىسى ازىرگە قارىمتا، جىلدام شابۋىلعا دايىن ەمەس. ونى كوپ ويىنىنان كورىپ ءجۇرمىز. وڭ جاق قورعانىسىندا داني كارۆاحال، ترەنت الەكساندەر-ارنولد سىندى ويىنشىلارى جوق، ورتادا ەدەر ميليتان جاراقات الىپ قالدى. سول سەبەپتى «قايراتتا» گول سوعاتىن مۇمكىندىك بولادى دەگەن ويدامىن، - دەيدى سپورت كوممەنتاتورى.

ونىڭ ايتۋىنشا، جانكۇيەرلەر بۇگىن قىزىقتى ماتچ تاماشالايدى. وعان قوس كوماندا بارىنشا كۇش سالادى.

ءباسى بولەك باسەكە

ءتورت جىلداي بۇرىن چەمپيوندار ليگاسىندا كورولدىك كلۋب ءوز الاڭىندا مولدوۆانىڭ «شەريف» كومانداسىنا 1:2 ەسەبىمەن ەسە جىبەرگەن ەدى. بۇل جانكۇيەرلەر كۇتپەگەن جاعداي بولدى. ويتكەنى، كوپشىلىك كورولدىك كلۋبتىڭ جەڭىسىنە كۇماندانا قويماعان ەدى.

- مەن «قايراتقا» وسىنداي جەڭىس تىلەيمىن. وسىلايشا ايدى اسپانعا شىعارىپ، جەتىستىككە جەتىپ جاتسا، ەل فۋتبولىنداعى ەرەكشە وقيعا بولار ەدى. ولار ءاربىر كەزدەسۋدەن ۇلكەن تاجىريبە جيناقتاپ كەلەدى. ىرىكتەۋ كەزەڭىندە ءتورت كوماندانى ارتتا قالدىرىپ، نەگىزگى كەزەڭگە دەيىن جەتۋى كوپ جايدى ايعاقتايدى. قارسىلاسىنىڭ ەشقايسىسى وڭاي بولعان جوق. باپكەرلىك قۇرام دۇرىس تاكتيكانى قولدانا ءبىلدى. ەندى وسىنداي ساتتىلىكتى الداعى ويىننان كۇتەمىز. كوماندا قۇرامىندا تاجىريبەلى فۋتبولشىلار بار. وعان قوسا بولاشاعىنان ۇلكەن ءۇمىت كۇتتىرەتىن جاستار شوعىرى ءوسىپ كەلەدى. بۇل ولار ءۇشىن وزدەرىن جاقسى قىرىنان كورسەتە الاتىن ۇلكەن مۇمكىندىك دەپ باعالايمىن. قازاق فۋتبولىنىڭ بولاشاعى قانداي ەكەنىن كورسەتسە، ولارعا قىزىعۋشىلىق بىلدىرەتىن كوماندالار سانى بولمايدى. قىسقاسى، كىم-كىم ءۇشىن دە بۇگىنگى ويىننىڭ ءباسى ارتىپ تۇر دەپ ايتا الامىن، - دەيدى جانكۇيەر باقداۋلەت امانجول.

ايتا كەتسەك، UEFA چەمپيوندار ليگاسى نەگىزگى كەزەڭىنىڭ 2-تۋرىنداعى كەزدەسۋ بۇگىن، 30-قىركۇيەكتە ساعات 21:45 تە الماتىداعى ورتالىق ستاديوندا باستالىپ، «Qazaqstan» جانە «Qazsport» تەلەارناسىنان تىكەلەي ەفيردە كورسەتىلەدى.

باس تورەشى مىندەتى يتاليالىق ماركو گۋيداعا جۇكتەلىپ وتىر. وعان دجوردجيو پەرەتتي مەن دجۋزەپپە پەرروتتي كومەكتەسەدى. ءتورتىنشى تورەشى دە سول ەلدىڭ وكىلى - سيمونە سوتستسا.