قايرات ساتىبالدى سوتقا ونلاين قوسىلىپ، كىناسىن مويىندادى

استانا. قازاقپارات - 2022 -جىلدىڭ ناۋرىز ايىندا «قازاق تەلەكوم» ا ق-نىڭ لاۋازىمدىق وكىلەتتىكتەرىن اسىرا پايدالاندى جانە قاراجاتىن اسا ءىرى مولشەردە جىمقىردى دەگەن كۇدىككە ءىلىنىپ، كەيىن وزگە دە زاڭسىز ارەكەتتەرى اشكەرە بولىپ، اقىرى 6 جىلعا باس بوستاندىعىنان ايىرىلعان كاسىپكەر قايرات ساتىبالدى تاعى سوت الدىندا جاۋاپ بەردى.

سوتتا پروكۋرور ايىپتاۋ اكتىسىن جاريالادى. قايرات ساتىبالدىعا ق ر قىلمىستىق كودەكسىنىڭ 218-بابى 3-بولىگىنىڭ 3-تارماعى، اتاپ ايتساق، «قىلمىستىق جولمەن الىنعان اقشانى جانە (نەمەسە) وزگە دە مۇلىكتى زاڭداستىرۋ» بابى بويىنشا ايىپ تاعىلۋدا. سونىمەن قاتار، وسى باپتىڭ ءۇشىنشى بولىگىندە قىلمىستىق جولمەن الىنعان كىرىستەردى اسا ءىرى كولەمدەگى زاڭداستىرۋ ايىبى بار. ول ءۇشىن مۇلكى تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن.

كاسىپكەر قايرات ساتىبالدى اقشانى جىلىستاتۋ ءىسى بويىنشا وتكەن ءبىرىنشى سوت وتىرىسىندا ءوز كىناسىن تولىق مويىندادى. ول وزىنە ۇرلانعان قاراجات كولەمىمەن كەلىسەتىنىن جەتكىزدى.

سوت وتىرىسى بەلگىسىز مەرزىمگە كەيىنگە قالدىرىلدى. وسى ۋاقىت ىشىندە ساتىبالدى كىنانى مويىنداۋ تۋرالى كەلىسىم تۇرىندەگى پروتسەسسۋالدىق كەلىسىمدى جانە زاڭسىز الىنعان مۇلىكتى قايتارۋدى تالقىلاۋعا نيەت ءبىلدىردى.

ايتا كەتەيىك، بۇعان دەيىن قايرات ساتىبالدى مەملەكەتكە جالپى كولەمى 732,8 ميلليارد تەڭگە قاراجات قايتارعانى حابارلانعان بولاتىن.

ەستەرىڭىزگە سالساق، 2022 -جىلدىڭ قىركۇيەگىندە استاناداعى بايقوڭىر اۋدانىنىڭ سوتى ۇكىمدى جاريالادى. ساتىبالدى التى جىلعا باس بوستاندىعىنان ايىرىلدى، مۇلكى تاركىلەندى.

پرەزيدەنتكە ونىڭ مەملەكەتتىك ناگرادالارى مەن ۇ ق ك گەنەرال-مايورى اتاعىنان ايىرۋ تۋرالى ۇسىنىلدى. سونداي-اق 10 جىل بويى مەملەكەتتىك قىزمەتتە قىزمەت اتقارۋعا تىيىم سالىندى.

اۆتور
ورالحان قوجانوۆ