قاۋىن با، قاربىز با - قايسىسى پايدالىراق؟

جازدىڭ اپتاپ ىستىعىندا ءشول قاندىرىپ، كوڭىل سەرگىتەتىن ەڭ تانىمال جەمىستەر - قاۋىن مەن قاربىز. ەكەۋى دە ءدامدى، حوش ءيىستى، ءارى اعزاعا پايدالى. دەگەنمەن، قايسىسى دەنساۋلىققا كوبىرەك پايدا اكەلەدى؟

قۇرامى مەن كالورياسى

قاربىز -%90-92 سۋدان تۇراتىن جەمىس. 100 گرام قاربىزدا نەبارى 30 ككال بار. قۇرامىندا ا جانە س دارۋمەندەرى، كالي، سونداي-اق قۋىقاستى بەزى اۋرۋلارىنىڭ الدىن الۋعا كومەكتەسەتىن ليكوپين زاتى بار.

قاۋىننىڭ كالورياسى ءسال جوعارى - 100 گرامدا شامامەن 35- 40 ككال. قاۋىن س دارۋمەنىنە، بەتا-كاروتينگە (ا دارۋمەنىنىڭ باستاپقى ءتۇرى)، فولي قىشقىلىنا، كاليگە جانە تابيعي قانتقا باي. سونىمەن قاتار، قاۋىندا اسقازان-ىشەك جولىنىڭ جۇمىسىن جاقسارتاتىن تالشىقتار مول.

پايداسى

قاربىزدىڭ پايداسى:

ءشولدى تەز قاندىرادى؛
قان قىسىمىن رەتتەيدى؛
بۇيرەك جۇمىسىن جاقسارتادى، نەسەپ جۇرگىزەدى؛
بۇلشىق ەتتىڭ قالپىنا كەلۋىنە ىقپال ەتەدى؛
قۇرامىنداعى انتيوكسيدانتتار اعزانى ەرتە قارتايۋدان قورعايدى.
قاۋىننىڭ پايداسى:

اس قورىتۋدى جەڭىلدەتەدى؛
قانازدىقتىڭ الدىن الادى؛
تەرىنى، شاشتى جانە تىرناقتى جاقسارتادى؛
جۇيكەنى تىنىشتاندىرادى؛
يممۋنيتەتتى نىعايتادى.
كىمگە اباي بولۋ كەرەك؟

قانت ديابەتىمەن اۋىراتىن ادامدار ءۇشىن قاۋىندى از مولشەردە عانا تۇتىنۋ كەرەك، سەبەبى ونىڭ قۇرامىندا قانت كوپ. قاربىزدا دا قانت بار، ءبىراق ول قاۋىنعا قاراعاندا ازداۋ.

بۇيرەك اۋرۋى بار جاندارعا دا بۇل جەمىستەردى شامادان تىس جەۋگە بولمايدى، ويتكەنى قۇرامىنداعى كالي دەنەدەن دۇرىس شىعارىلماي قالۋى مۇمكىن.

ءار جەمىستىڭ پايداسى ءارتۇرلى. ماقساتىڭىزعا قاراي تاڭداي الاسىز: ارتىق سالماقتان ارىلعىڭىز كەلسە نەمەسە ءشول قىسسا - قاربىز. يممۋنيتەتتى نىعايتقىڭىز كەلسە، اس قورىتۋ مەن قان اينالىمىن جاقسارتقىڭىز كەلسە - قاۋىن. ەڭ باستىسى - ەكى جەمىستى دە پىسكەندە، مولشەرمەن جەۋ.