قاي وڭىرلەردە ازىق-تۇلىك باعاسى ءوستى

استانا. KAZINFORM - ۇلتتىق بانك ەلىمىزدىڭ وڭىرلەرىندەگى باعا ءوسىمىنىڭ ەڭ جوعارى جانە ەڭ تومەن دەڭگەيلەرىن ەسەپتەدى. ەڭ جوعارى ازىق-تۇلىك باعاسىنىڭ ءوسۋى اقمولا وبلىسىندا. ەڭ تومەن ءوسىم جامبىل، قوستاناي جانە تۇركىستان وبلىستارىندا تىركەلدى.

ناۋرىزدا ەلدە جىلدىق ينفلياتسيا ۇدەپ (اقپاندا - %9,4)، %10,0 بولدى. جىلدىق ينفلياتسيا 16 وڭىردە جەدەلدەپ، 4 وڭىردە باياۋلادى.

جىلدىق ينفلياتسيانىڭ ەڭ جوعارى ءمانى استانا قالاسىندا تىركەلدى - %13,3.

- ناۋرىزدا ازىق-تۇلىك تاۋارلارىنىڭ باعاسى %7,6 عا دەيىن قارقىن الدى (اقپاندا - %6,5). وسى توپتاعى تاۋارلاردىڭ باعاسى اقمولا وبلىسىندا (%10,6) ەڭ جوعارى، ال جامبىل، قوستاناي جانە تۇركىستان وبلىستارىندا (%6,3 دان) مەيىلىنشە تومەن ءوسىم كورسەتتى. ناۋرىزدا ازىق-تۇلىككە جاتپايتىن تاۋارلار باعاسىنىڭ ءوسۋ قارقىنى ج/ج %9,1 عا دەيىن جەدەلدەدى (اقپاندا - %8,7). ەڭ جوعارى ءمان تۇركىستان وبلىسىندا (%15,2)، ەڭ تومەن ءمان الماتى وبلىسىندا (%5,8) تىركەلدى، - دەلىنگەن ۇلتتىق بانك حابارلاماسىندا.

ناۋرىزدا اقىلى كورسەتىلەتىن قىزمەت باعاسى %14,3 عا دەيىن جەدەلدەدى (اقپاندا - %14,1). سونىمەن قاتار باعا باتىس قازاقستان وبلىسىندا (%19,1) جالپى رەسپۋبليكالىق دەڭگەيدەن ايتارلىقتاي جوعارى، پاۆلودار وبلىسىندا (%7,2) ەداۋىر تومەن ءوسىم كورسەتتى.

ناۋرىزدا ايلىق ينفلياتسيا ەلدە %1,3 عا ءوستى.

ايتا كەتەلىك ەل وڭىرلەرىندەگى ينفلياتسيا دەڭگەيى تۋرالى جازعان ەدىك. سونىمەن قاتار ۇلتتىق بانك ءتوراعاسى تيمۋر سۇلەيمەنوۆ بازالىق مولشەرلەمەنى ايقىنداۋ ماسەلەسىنە ارنالعان كەزەكتى باسپا ءسوز ءماسليحاتىندا كۇزگە قاراي قازاقستاندا ينفلياتسيا بولۋى مۇمكىن دەگەنگە ساياتىن بولجامدارعا جاۋاپ بەرگەن ەدى.