قاي ەلدىڭ مۇعالىمدەرى ەڭ كوپ جالاقى الادى؟

استانا. قازاقپارات - الەم ەلدەرىندە مۇعالىمدەرگە جالاقى تولەۋ جۇيەسى ءارتۇرلى. بۇل ءار مەملەكەتتىڭ جەرگىلىكتى زاڭى مەن وقىتۋشىلاردىڭ ەڭبەك وتىلىنە بايلانىستى وزگەرىپ وتىرادى، دەپ حابارلايدى 24kz.

بيىل سالا ماماندارىنا ەڭ جوعارى ايلىق تولەيتىن ەلدەردىڭ ءتىزىمىن ليۋكسەمبۋرگ باستاپ تۇر. مۇنداعى مۇعالىمدەر جىلىنا شامامەن 137 مىڭ دوللار جالاقى الادى.

تاعى قاي ەلدەردە وقىتۋشىلارعا جاقسى جاعداي جاسالعان؟

الەمدە مۇعالىمدەرگە ەڭ جوعارى جالاقى تولەيتىن ەل - ليۋكسەمبۋرگ. ەكونوميكالىق ىنتىماقتاستىق جانە دامۋ ۇيىمىنىڭ كەيىنگى زەرتتەۋىندە كەلتىرىلىگەن دەرەك وسىنداي. مۇندا سالا ماماندارىنا جاقسى جاعداي جاسالعان. مىسالى، باكالاۆر دارەجەسىن العان جاس مامانعا جىلىنا 70 مىڭ ا ق ش دوللار كولەمىندە جالاقى تولەنەدى.

تابىس كولەمى وقىتۋشىنىڭ ەڭبەك وتىلىنە بايلانىستى وسە بەرەدى. سالادا 15 جىل ەڭبەك ەتكەن مامانعا 100 مىڭ دوللار جالاقى تولەنەدى. ال 30 جىلدان استام تاجىريبەسى بار مۇعالىمگە تولەنەتىن سوما دا قوماقتى. بۇل - شامامەن 137 مىڭ دوللار.

ماگيستر دارەجەسى بار مۇعالىمنىڭ تابىسى جوعارى

شاكىرت تاربيەلەپ وتىرعان شۆەيتساريالىق مامانداردىڭ دا ايلىق تابىسى از ەمەس. بۇل ەلدىڭ مۇعالىمدەرگە جالاقى تولەۋ جۇيەسى ليۋكسەمبۋرگكە ۇقساس. ءبىراق ماگيستر دارەجەسىن بىتىرگەن مامان باكالاۆرمەن عانا شەكتەلگەن وقىتۋشىعا قاراعاندا كوبىرەك الادى. ال مانساپ جولىن ەندى باستاعان ورتا مەكتەپ مۇعالىمىنىڭ ايلىق تابىسى 73 مىڭ دوللار شاماسىندا. ونىڭ مولشەرى ەڭبەك وتىلىنە قوسىلعان ءار ون جىل سايىن 10 مىڭ دوللارعا ۇلعايا بەرەدى.

ب ا ءا- دە مۇعالىم تابىسىنان سالىق تولەمەيدى

بىرىككەن اراب امىرلىكتەرىندە مۇعالىمدەردىڭ جالاقىسىنان تابىس سالىعى الىنبايدى. ولارعا قوسىمشا تولەمسىز ورتاشا ەسەپپەن 2500 مەن 5500 دوللار اراسىندا ايلىق تولەنەدى. سونىمەن قاتار ءبىلىم بەرۋ ۇيىمدارى وقىتۋشىلاردىڭ اي سايىنعى تۇرعىن ءۇي جاردەماقىسىن تولەيدى. ءتىپتى، تەگىن پاتەر دە بەرەدى. سونداي-اق مەديتسينالىق ساقتاندىرۋ، ءبىر جىلدىق اقىسىز اۋە قىزمەتىمەن قامتاماسىز ەتەدى. بۇدان بولەك، مۇعالىمدەردىڭ بىلىكتىلىگىن ارتتىرۋى ءۇشىن حالىقارالىق تاجىريبە، شەبەرلىك ساعاتتارىنا قاتىسۋ مۇمكىندىگى قاراستىرىلعان.

گەرمانيادا ايلىق ەڭبەك وتىلىنە قاراي تولەنەدى

گەرمانيادا دا ءبىلىم سالاسى قىزمەتكەرلەرىنە جوعارى جالاقى تولەنەدى. اسىرەسە، حالىقارالىق مەكتەپتەردە ءبىلىم بەرەتىن مامانداردىڭ ايلىق تابىسى ورتا مەكتەپ مۇعالىمىنە قاراعاندا الدەقايدا كوپ. وعان قوسا ەڭبەك ءوتىلى مەن كۆاليفيكاتسيالىق ءبىلىم دەڭگەيى جوعارىلاعان سايىن تولەنەتىن ايلىق مولشەرى دە ۇلعايا بەرەدى. ەكونوميكالىق ىنتىماقتاستىق جانە دامۋ ۇيىمى كەلتىرگەن مالىمەتكە قاراعاندا، سالاعا ەندى قادام باسقان جاس ماماننىڭ تابىسى 1500 دوللارعا جۋىق. ال ەڭبەك ءوتىلى 20 جىلدان اسسا، 3 ەسە ارتىق تولەنەدى.

قازاقستانداعى جالاقى تاعايىنداۋ

وقۋ-اعارتۋ مينيسترلىگى كەيىنگى بەس جىلدا پەداگوگتەردىڭ جالاقىسى %100 عا وسكەنىن حابارلادى. مينيسترلىك مالىمەتىنشە، ەلدە 8 مىڭعا جۋىق ورتا ءبىلىم بەرۋ ۇيىمىندا 400 مىڭعا تارتا پەداگوگ جۇمىس ىستەيدى.

«پەداگوگ مارتەبەسى تۋرالى» زاڭ قابىلدانعاننان كەيىن، پەداگوگتەردىڭ جالاقىسى بويىنشا قالىپتاسۋ ءتارتىبى وزگەرگەن. ەندى جالاقى مولشەرى تومەندەگىدەي كريتەريلەرگە بايلانىستى انىقتالادى:

سانات (شەبەر، زەرتتەۋشى، ساراپشى، مودەراتور) دەڭگەيى؛

ەڭبەك ءوتىلى؛

جۇكتەمە كولەمى؛

ەڭبەك ەتۋ جاعدايى؛

اكادەميالىق دارەجەسىنىڭ بولۋى (10 ا ە ك)؛

تالىمگەرلىك ەتۋى، ساباقتان تىس سپورتتىق دارىستەر بەرۋ (بازالىق لاۋازىمدى ەڭبەكاقىدان %100)

وسىلايشا، ءتۇرلى ساناتتارىنىڭ بولۋىنا بايلانىستى پەداگوگتەرگە كەلەسىدەي ۇستەمەاقى تولەنەدى:

* پەداگوگ-شەبەر – 50 پايىز

* ⁠پەداگوگ-زەرتتەۋشى - 40 پايىز

* ⁠پەداگوگ-ساراپشى - 35 پايىز

* ⁠پەداگوگ-مودەراتور - 30 پايىز

جالاقى مولشەرى

مينيسترلىك اۋىلداعى پەداگوگتەردىڭ جالاقىسى قالالىق ارىپتەستەرىنە قاراعاندا كەمىندە %25- عا جوعارى ەكەنىن ايتادى.

2024 -جىلدىڭ قورىتىندىسى بويىنشا قازاقستاندا پەداگوگتەردىڭ ورتاشا ايلىق جالاقىسى 1 مولشەرلەمە ءۇشىن (16 ساعات) 352 مىڭ تەڭگە، ال اۋىل مۇعالىمدەرى ءۇشىن 435 مىڭ تەڭگەنى قۇراعان.

«بۇل رەتتە ۇلتتىق ءبىلىم بەرۋ دەرەكتەر بازاسىنىڭ مالىمەتىنشە، ەلىمىزدىڭ پەداگوگتەرىنىڭ جارتىسى 1,5 مولشەرلەمەمەن (24 ساعات) جۇمىس جاساپ، ايىنا ورتاشا 581 مىڭ تەڭگە جالاقى الادى» دەيدى مينيسترلىك.

سونىمەن قاتار، پەداگوگتەرگە ءبىلىم بەرۋ ىسىندەگى جەتىستىكتەرى، وليمپيادا جۇلدەگەرلەرىن دايىنداعانى جانە مەملەكەتتىك ناگراداعا يە بولعانى ءۇشىن اقشالاي سىياقى بەرىلەدى.