قاتەرلى ىسىككە قارسى وتاندىق ءدارى قاشان تىركەۋدەن وتەدى
استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك قاتەرلى ىسىككە قارسى وتاندىق ءدارىنى تىركەۋ راسىمىنە قاتىستى تۇسىنىك بەردى.
- قازىر ەكىنشى ساتىنى (كلينيكالىق سىناقتى) تابىستى ءوتىپ جاتىرمىز. پاۆلودار، قاراعاندى، الماتى، استانا قالالارىندا اۋرۋلار قوسىلدى. ناتيجەلەرىن قىركۇيەك ايىندا باياندايمىز. ەگەر ءبارى دۇرىس بولسا، جىلدىڭ سوڭىنا دەيىن ءدارىنى تىركەۋگە رەسمي تۇردە رۇقسات بەرەمىز، - دەدى س. نۇربەك پارلامەنت پالاتالارىنىڭ بىرلەسكەن وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ەسكە سالساق، بىلتىر قاڭتاردا عىلىم جانە جوعارى ءبىلىم ءمينيسترى ساياسات نۇربەك وتاندىق عالىم قاتەرلى ىسىككە قارسى ءدارى ويلاپ تاپقانىن ايتقان بولاتىن.
ءمينيستردىڭ ايتۋىنشا، يننوۆاتسيالىق ءدارىنى الدىمەن قوياندار مەن تىشقاندارعا سىناعان. سوسىن ونكولوگيا ۋنيۆەرسيتەتىندە 15 ادام سىناقتىڭ ءبىرىنشى كەزەڭنەن ءوتتى.
