قاتەرلى ىسىككە قارسى وتاندىق ءدارى قاشان دايىن بولادى

استانا. KAZINFORM - قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ باسقارما ءتوراعاسى ەربول بەكمۇحامبەتوۆ قاتەرلى ىسىككە قارسى وتاندىق ءدارى سىناعى قاشان اياقتالاتىنىن ايتتى.

بۇگىن ورتالىق كوممۋنيكاتسيالار قىزمەتىندەگى بريفينگتە ب ا ق وكىلدەرى ينستيتۋت باسشىسىنان وتانداسىمىز، بيوتەحنولوگ دوس سارباسوۆ ويلاپ تاپقان قاتەرلى ىسىككە قارسى ءدارى قاشان تولىق سىناقتان وتەتىندىگىن سۇراعان ەدى.

- ءدارى قازىرگى زامانعى حيمياتەراپيا بارلىق مۇمكىندىگىن سارقىعان پاتسيەنتتەردى ەمدەۋگە ارنالعان. كلينيكالىق زەرتتەۋ ءالى ءجۇرىپ جاتىر، اياقتالعان جوق. كلينيكالىق سىناقتىڭ ەكىنشى كەزەڭى جۇرگىزىلىپ جاتىر. جاقسى ناتيجە جانە جاناما اسەر بارىنشا از بولۋى ءۇشىن بەلسەندى زاتتاردىڭ دۇرىس مولشەرى ىرىكتەلەدى. اتالعان سىناقتار اياقتالعان سوڭ تىركەۋ ءراسىمى جۇرگىزىلەدى، - دەدى ول.

ونىڭ ايتۋىنشا، پروتسەستى كەز كەلگەن تۇراقتاندىرۋ - وڭ ناتيجە.

- كلينيكالىق ماتەريالداردى تولىق جيناعاننان كەيىن ءبىز مۇنى مىندەتتى تۇردە ايتامىز. سىناقتىڭ قازىرگى كەزەڭى جىل سوڭىنا دەيىن جۇرگىزىلەتىنى انىق. سودان كەيىن عانا ناتيجەسىن تولىق كورە الامىز، - دەپ جاۋاپ بەردى ەربول بەكمۇحامبەتوۆ.

وتكەن جىلدىڭ قاڭتارىندا عىلىم جانە جوعارى ءبىلىم ءمينيسترى ساياسات نۇربەك وتاندىق عالىم قاتەرلى ىسىككە قارسى ءدارى ويلاپ تاپقانىن ايتقان بولاتىن.

ءمينيستردىڭ ايتۋىنشا، يننوۆاتسيالىق ءدارىنى الدىمەن قوياندار مەن تىشقاندارعا سىناعان. سوسىن ونكولوگيا ۋنيۆەرسيتەتىندە 15 ادام سىناقتىڭ ءبىرىنشى كەزەڭنەن ءوتتى.

- ولار قاتەرلى ىسىكپەن اۋىراتىن ادامدار. كەلەسى جىلى نارىققا شىعۋدى جوسپارلاپ وتىرمىز، - دەگەن ەدى ساياسات نۇربەك.

اۆتور

مارلان جيەمباي