قاتار 2036 -جىلعى وليمپيادانى وتكىزۋگە ءوتىنىم بەردى
استانا. KAZINFORM - كاتار 2036 -جىلعى جازعى وليمپيادا جانە پاراليمپيادا ويىندارىن وتكىزۋگە رەسمي تۇردە ءوتىنىم بەردى. بۇل تۋرالى ءوتىنىمنىڭ حالىقارالىق وليمپيادا كوميتەتىنە (ح و ك) جىبەرىلگەنىن راستاعان كاتار وليمپيادالىق كوميسسياسى ءمالىم ەتتى، دەپ حابارلايدى Anadolu Ajansi.
مالىمدەمەدە قاتاردىڭ زاماناۋي سپورتتىق ينفراقۇرىلىم، حالىقارالىق ۇيىمداستىرۋ دەڭگەيىنە جانە قاجەتتى تاجىريبەگە يە ەكەنى اتاپ ءوتىلدى. وليمپيادا كوميتەتىنىڭ ءتوراعاسى جانە ءوتىنىم بەرۋ كوميسسياسىنىڭ ءتوراعاسى شەيح دجۋۆان بين حاماد ءال ءتانيدىڭ اتاپ وتۋىنشە، ويىنداردى وتكىزۋگە دەگەن ۇمتىلىس سپورتتىڭ حالىقتار اراسىنداعى ءوزارا تۇسىنىستىك پەن بەيبىتشىلىكتى ىلگەرىلەتۋ الاڭى رەتىندەگى ۇلتتىق كوزقاراستى تانىتادى.
قاتار پرەمەر- ءمينيسترى جانە سىرتقى ىستەر ءمينيسترى مۇحاممەد بين ابدۋرراحمان ءال تاني ەلدىڭ ءوتىنىمى - ويىنداردى وتكىزۋگە ۇمتىلۋ عانا ەمەس، قاتاردا قابىلدانعان «بەيبىتشىلىك ءۇشىن سپورت» فيلوسوفياسىنىڭ كورىنىسى ەكەنىن اتاپ ءوتتى. ول سونىمەن قاتار قاتاردىڭ الدىڭعى قاتارلى قاۋىپسىزدىك تەحنولوگيالارىمەن قامتاماسىز ەتىلگەن وزىق ينفراقۇرىلىمىنا توقتالدى.
اتاپ وتىلگەندەي، وليمپيادانى وتكىزۋگە ءوتىنىم بەرۋ ەلدىڭ ءىرى حالىقارالىق جارىستاردى، اتاپ ايتقاندا، قاۋىپسىزدىك، جايلىلىق جانە ۇيىمداستىرۋ دەڭگەيى بويىنشا جوعارى باعا العان 2022 -جىلعى فۋتبولدان الەم چەمپيوناتىن ۇيىمداستىرۋداعى تابىستى تاجىريبەسىنىڭ قيسىندى جالعاسى.
تاڭدالعان جاعدايدا قاتار تاياۋ شىعىس پەن پارسى شىعاناعى ايماعىنداعى وليمپيادا ويىندارىن وتكىزەتىن العاشقى مەملەكەت بولادى.
قاتار بۇعان دەيىن ءبىرقاتار ءىرى جارىستاردى وتكىزگەن بولاتىن، سونىڭ ىشىندە 2006 -جىلعى ازيا ويىندارى، 2015 -جىلعى گاندبولدان الەم چەمپيوناتى، 2019 -جىلعى جەڭىل اتلەتيكادان الەم چەمپيوناتى، 2024 -جىلعى سۋ سپورتى بويىنشا الەم چەمپيوناتى بار، سونىمەن قاتار 2025 -جىلعى ۇستەل تەننيسىنەن الەم چەمپيوناتىن، 2025 -جىلعى الەم چەمپيوناتىن، 2026 -جىلعى وق اتۋدان الەم چەمپيوناتىن، 2027 -جىلى باسكەتبولدان الەم چەمپيوناتىن جانە 2030 -جىلعى ازيا ويىندارىن قابىلدايدى.
بۇعان دەيىن لوس-اندجەلەستە وتەتىن 2028 -جىلعى وليمپيادا ويىندارىنىڭ كەستەسى رەسمي وليمپيادا سايتىندا جاريا ەتىلگەنىن حابارلاعان بولاتىنبىز.
