قاسىم-جومارت توقايەۆ ەۋروپالىق كەڭەس پرەزيدەنتى انتونيۋ كوشتامەن كەزدەستى
تاشكەنت. KAZINFORM - «ورتالىق ازيا - ەۋروپا وداعى» سامميتىنە قاتىسۋ ءۇشىن سامارقاند قالاسىنا كەلگەن قاسىم-جومارت توقايەۆ ەۋروپالىق كەڭەس پرەزيدەنتى انتونيۋ كوشتامەن كەزدەستى.
بۇل تۋرالى اقوردانىڭ باسپا ءسوز قىزمەتى حابارلادى.
ەۋروپا وداعى قازاقستاننىڭ ءىرى ساۋدا سەرىكتەسى ءارى شەتەلدىك ينۆەستورى سانالادى. ەلىمىزگە شەتەلدەن تارتىلعان تىكەلەي ينۆەستيتسيانىڭ 40 پايىزدان استامى اتالعان ۇيىمعا تيەسىلى. بىلتىر قازاقستان مەن ەۋروپا وداعىنا مۇشە ەلدەردىڭ تاۋار اينالىمى 50 ميلليارد دوللارعا جۋىقتادى. بۇل ەۋروپا وداعى مەن ورتالىق ازيا ەلدەرى اراسىنداعى ساۋدا- ساتتىق كولەمىنىڭ 80 پايىزىن قۇرايدى.
كەزدەسۋدە ەكونوميكانىڭ ءتۇرلى سەكتورلارىنداعى كوپجوسپارلى ىنتىماقتاستىقتى ودان ءارى نىعايتۋ ماسەلەلەرى قارالدى.
قاسىم-جومارت توقايەۆ پەن انتونيۋ كوشتا ءوزارا سەنىمگە، ستراتەگيالىق مۇددەگە جانە ۇزاقمەرزىمدى پەرسپەكتيۆاعا نەگىزدەلگەن قازاقستان مەن ەۋروپالىق كەڭەس اراسىنداعى سەرىكتەستىكتى قارقىندى دامىتۋدىڭ ماڭىزىن اتاپ ءوتتى.
بۇعان دەيىن مەملەكەت باسشىسىنىڭ سامارقاند قالاسىنا بارعانىن جازعان ەدىك.
