قاسىم-جومارت توقايەۆ رەسەيمەن بىرلەسكەن جوبالاردى اتادى
استانا. KAZINFORM — رەسەيمەن سەرىكتەستىك اياسىندا ەلىمىزدە جاقىن ارادا 1 گۆت ەكولوگيالىق تازا قۋات كوزى ىسكە قوسىلادى. بۇل تۋرالى قازاقستان مەن رەسەيدىڭ ⅹⅹءوڭىرارالىق ىنتىماقتاستىق فورۋمىنا بەينەكونفەرەنتسيا رەجيمىندە قاتىسقان مەملەكەت باسشىسى قاسىم-جومارت توقايەۆ ايتتى.
مەملەكەت باسشىسى ءبىر جىل بۇرىن قازاقستان مەن رەسەيدىڭ ەنەرگەتيكالىق جۇيەلەرىنىڭ قوسارلاس جۇمىس ىستەۋىن قامتاماسىز ەتۋ جونىندەگى شارالار تۋرالى ۇكىمەتارالىق كەلىسىمگە قول قويىلعانىن ەسكە سالدى. پرەزيدەنتتىڭ پىكىرىنشە، ونى ىسكە اسىرۋ تاراپتاردىڭ ەنەرگەتيكا سەكتورىنداعى سەرىكتەستىگىن نىعايتۋعا مۇمكىندىك بەرەدى.
«كوكشەتاۋ، سەمەي مەن وسكەمەن قالالارىنداعى جىلۋ ەلەكتر ستانسيالارىنىڭ قۇرىلىسى بويىنشا ناقتى كەلىسىم جاسالدى. سەرىكتەستىگىمىز جاڭارتىلاتىن قۋات كوزدەرى سالاسىندا دا بەلسەندى دامىپ كەلەدى. رەسەي تاراپىنىڭ قاتىسۋىمەن ەلىمىزدە جالپى قۋاتى 370 مۆت بولاتىن جوبالار پايدالانۋعا بەرىلدى. قول جەتكىزىلگەن ۋاعدالاستىقتار اياسىندا جاقىن ارادا 1 گۆت ەكولوگيالىق تازا قۋات كوزىن ىسكە قوسۋ جوسپارلانعان»، - دەدى قاسىم-جومارت توقايەۆ.
پرەزيدەنت بيىل وندىرىستىك كووپەراتسيا سالاسىنداعى بىرلەسكەن ءىس-قيمىل باعدارلاماسىنىڭ قابىلدانعانىنا بەس جىل تولعانىن ايتتى. اتالعان باعدارلاما اياسىندا جالپى ينۆەستيتسيا كولەمى 18,5 ميلليارد دوللارعا جۋىقتايتىن 93 بىرلەسكەن جوبا جۇزەگە اسىرىلدى. سونىڭ ناتيجەسىندە 22 مىڭنان استام جۇمىس ورنى پايدا بولدى.
«بيىل «تاتنەفت» كومپانياسىنىڭ قاتىسۋىمەن ساران قالاسىندا جىلىنا 3,5 ميلليون شينا شىعاراتىن زاۋىت اشىلدى. «كاماز» كومپانياسىمەن سەرىكتەستىك نەگىزىندە ماشينا جاساۋعا ارنالعان قۇرال- جابدىقتاردىڭ جەرگىلىكتى ءوندىرىسى قولعا الىندى. قازان ايىندا قوستانايدا جىلىنا 40 مىڭ تونناعا دەيىن شويىن قۇيماسىن شىعاراتىن اۋقىمدى جوبا ىسكە قوسىلدى. كەلەسى جىلى كولىكتىڭ قوزعالتقىش بەلتەمىرىنىڭ قوسالقى بولشەكتەرىن شىعاراتىن زاۋىتتى اشۋ جوسپارلانعان. قازىرگى كەزدە جالپى ينۆەستيتسيا كولەمى 29,5 ميلليارد دوللاردان استام 49 جوبا ىسكە اسىرىلىپ جاتىر. بۇل 20 مىڭ ادامدى جۇمىسپەن قامتيدى. سونىمەن قاتار جامبىل وبلىسىندا «ەۆروحيم» جانە «ۋرالحيم» كومپانيالارى مينەرالدى تىڭايتقىشتار وندىرەتىن اۋقىمدى جوبالارعا كىرىستى»، - دەدى قاسىم-جومارت توقايەۆ.
