قاسىم-جومارت توقايەۆ گرەك رەسپۋبليكاسىنىڭ پرەزيدەنتىن تاۋەلسىزدىك كۇنىمەن قۇتتىقتادى
استانا. KAZINFORM - قاسىم-جومارت توقايەۆ كاتەرينا ساكەللاروپۋلۋدى جانە گرەك حالقىن ۇلتتىق مەرەكەسى - تاۋەلسىزدىك كۇنىمەن قۇتتىقتادى، دەپ حابارلايدى اقوردانىڭ باسپا ءسوز قىزمەتى.
- بۇگىندە گرەكيا ەۋروپا وداعىنىڭ بەلسەندى ەلدەرىنىڭ ءبىرى رەتىندە ءوزىنىڭ تۇراقتى دامۋ، حالىقتىڭ ءال- اۋقاتىن جاقسارتۋ جانە حالىقارالىق قاۋىمداستىقتاعى بەدەلىن ارتتىرۋ جولىندا ەلەۋلى جەتىستىكتەرگە قول جەتكىزىپ كەلەدى. وسى رەتتە مەملەكەتىڭىزدىڭ ءارى قاراي قارىشتاپ دامۋىنا، مەرەيى ءارقاشان ۇستەم بولۋىنا تىلەكتەسپىن. قازاقستان مەن گرەكيا اراسىنداعى مازمۇندى ساياسي ديالوگ پەن ءداستۇرلى دوستىقتان سەرپىن الاتىن ىنتىماقتاستىعىمىزدىڭ اياسى جىلدان-جىلعا كەڭەيىپ جاتقانىن ريزاشىلىقپەن اتاپ وتەمىن. كەلەشەكتە ەلدەرىمىز اراسىنداعى ىقپالداستىق جانە سان قىرلى بايلانىستار اۋقىمى ودان ءارى ۇلعايا تۇسەتىنىنە كامىل سەنەمىن،- دەپ جازىلعان جەدەلحاتتا.
قاسىم-جومارت توقايەۆ كاتەرينا ساكەللاروپۋلۋدىڭ اسا جاۋاپتى قىزمەتىنە تولاعاي تابىس، ال دوستاس گرەكيا حالقىنا قۇت-بەرەكە تىلەدى.
