قاسىم-جومارت توقايەۆ گۋربانگۋلى بەردىمۇحامەدوۆپەن بەيرەسمي كەزدەسۋ وتكىزدى
استانا. KAZINFORM - پرەزيدەنت قاسىم-جومارت توقايەۆ تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆپەن بەيرەسمي كەزدەسۋ وتكىزدى، دەپ حابارلايدى اقوردانىڭ باسپا ءسوز قىزمەتى.
ملەكەت باسشىسى مارتەبەلى مەيمانعا ءىلتيپات ءبىلدىرىپ، ەلىمىزدىڭ رۋحاني استاناسى، تۇركى حالىقتارىنا ورتاق قاسيەتتى مەكەن سانالاتىن تۇركىستان قالاسىنا ساپارمەن كەلگەنى ءۇشىن ريزاشىلىعىن جەتكىزدى.
- مەملەكەتتەرىمىز اراسىنداعى ىنتىماقتاستىقتىڭ قارقىندى دامىپ كەلە جاتقانى قۋانتادى. گاز سالاسىندا، سونداي-اق كولىك- لوگيستيكا باعىتىندا ستراتەگيالىق ماڭىزدى جوبالار بار. ءبىز بۇل جۇمىستاردى باقىلاۋدا ۇستايمىز. ويتكەنى ونىڭ ناتيجەسى قازاق- تۇرىكمەن ەكونوميكالىق بايلانىستارىن ودان ءارى وركەندەتۋگە ىقپال ەتەدى، - دەدى پرەزيدەنت.
قاسىم-جومارت توقايەۆ گۋربانگۋلى بەردىمۇحامەدوۆتى حالىقارالىق بەيبىتشىلىك جانە سەنىم جىلىنىڭ باستالۋىمەن قۇتتىقتادى. ونىڭ ايتۋىنشا، ب ۇ ۇ قولداعان بۇل باستاما تۇرىكمەنستاننىڭ الەمدىك دەڭگەيدەگى ابىروي- بەدەلى جوعارى ەكەنىن كورسەتەدى.
حالك ماسلاحاتىنىڭ ءتوراعاسى مەملەكەت باسشىسىنا كيەلى تۇركىستاندا قوناقجايلىق تانىتقانى ءۇشىن العىس ايتتى. سونىمەن قاتار قازاقستان تۇرىكمەنستاننىڭ ەڭ نەگىزگى ستراتەگيالىق سەرىكتەستەرىنىڭ ءبىرى ەكەنىن جەتكىزدى.
- ەكى ەل اراسىنداعى ساياسي، ساۋدا- ەكونوميكالىق جانە مادەني- گۋمانيتارلىق سالالارداعى قارىم- قاتىناستاردىڭ پەرسپەكتيۆاسى مول. ب ۇ ۇ اياسىندا حالىقارالىق بەيبىتشىلىك پەن سەنىم جىلىن جاريالاۋ جونىندەگى تۇرىكمەنستاننىڭ باستاماسىنا قولداۋ بىلدىرگەنىڭىز ءۇشىن ريزاشىلىعىمدى بىلدىرەمىن، - دەدى گۋربانگۋلى بەردىمۇحامەدوۆ.
كەزدەسۋ بارىسىندا ەكىجاقتى قارىم-قاتىناستاردىڭ بارلىق باعىتى بويىنشا سان قىرلى ستراتەگيالىق سەرىكتەستىكتى نىعايتۋ پەرسپەكتيۆاسى تالقىلاندى.
ءوزارا ساۋدا- ساتتىق كولەمىن 1 ميلليارد دوللارعا جەتكىزۋ ءۇشىن بايلانىستاردى دامىتۋدىڭ تىڭ مۇمكىندىكتەرىن قاراستىرۋ قاجەتتىگى اتاپ ءوتىلدى.
گاز سالاسىنداعى سەرىكتەستىكتى كەڭەيتۋ، ناقتى ايتقاندا، قازاقستان تاراپىنىڭ شەتەلدىك سەرىكتەستەرمەن بىرگە گالكىنىش كەن ورنىن يگەرۋ جوباسىنا قاتىسۋ ماسەلەسىنە ءمان بەرىلدى.
مەملەكەت باسشىسى «تۋرگۋندي - گەرات - كانداگار - سپين- بۋلداك» تەمىر جول قۇرىلىسىنىڭ جوباسىنا نازار اۋدارىپ، اتالعان جوبا تابىستى جۇزەگە اسسا، كولىك باعىتتارىن ءارتاراپتاندىرۋعا، ەكسپورت نارىقتارىن كەڭەيتۋگە جول اشاتىنىن ايتتى. سونىمەن قاتار سولتۇستىك - وڭتۇستىك باعىتىنداعى ترانزيت الەۋەتىن ارتتىرۋدا «قازاقستان - تۇرىكمەنستان - يران» تەمىر جول ماگيسترالى مەن قۇرىلىسى ءجۇرىپ جاتقان «تۇرىكمەنباشى - گارابوگاز - قازاقستان شەكاراسى» اۆتوكولىك جولى ماڭىزدى ءرول اتقارادى.
بۇدان بولەك، كەزدەسۋدە ءبىلىم بەرۋ، سيفرلاندىرۋ سالالارىنداعى ءوزارا ءتيىمدى ىقپالداستىق ماسەلەلەرى تالقىلاندى. قازاقستان تاراپى تۇرىكمەنستانعا مەملەكەتتىك قىزمەتتەردى سيفرلاندىرۋ، سونداي-اق IT- مامانداردىڭ بىلىكتىلىگىن ارتتىرۋ ىسىندە جان-جاقتى كومەك كورسەتۋگە دايىن ەكەنىن جەتكىزدى.
وسىعان دەيىن تۇركىستاندا قاسىم-جومارت توقايەۆ پەن گۋربانگۋلى بەردىمۇحامەدوۆتىڭ بەيرەسمي كەزدەسۋى وتەتىنى تۋرالى جازدىق.
