قاسىم-جومارت توقايەۆ قوستاناي قالاسىنداعى دەنە شىنىقتىرۋ-ساۋىقتىرۋ كەشەنىن ارالاپ كوردى
مەملەكەت باسشىسى قوستاناي وبلىسىنا بارعان جۇمىس ساپارى اياسىندا قوستاناي قالاسىنداعى دەنە شىنىقتىرۋ-ساۋىقتىرۋ كەشەنىن ارالاپ كوردى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
«يۋبيلەينىي» شاعىن اۋدانىندا ورنالاسقان نىسان جاقىندا پايدالانۋعا بەرىلگەن. مۇندا جەرگىلىكتى تۇرعىندار سپورتتىڭ شاعىن فۋتبول، باسكەتبول، ۆولەيبول جانە ۇستەل تەننيسى سياقتى تۇرلەرىمەن ەمىن-ەركىن اينالىسا الادى. سونداي-اق ورتالىقتا جاتتىعۋ جانە حورەوگرافيا زالدارى جۇمىس ىستەيدى. ەرەكشە قاجەتتىلىگى بار جاندارعا ءتيىستى جاعداي جاسالعان»، - دەلىنگەن حابارلامادا.
قوستاناي قالاسىنىڭ اكىمى مارات جۇندىبايەۆ پرەزيدەنتكە وبلىس ورتالىعىندا بۇقارالىق سپورتتى دامىتۋ شارالارى تۋرالى مالىمەت بەردى. ونىڭ ايتۋىنشا، قالا تۇرعىندارىنا دەنە شىنىقتىرۋ نىساندارىنىڭ قولجەتىمدىلىگىن قامتاماسىز ەتۋگە باسا نازار اۋدارىلادى.
مەملەكەت باسشىسى كەشەندەگى زالداردى ارالاپ كورىپ، جەرگىلىكتى تۇرعىندارمەن جانە جاس سپورتشىلارمەن اڭگىمەلەستى.
وسىدان كەيىن قاسىم-جومارت توقايەۆ قوستاناي قالاسىنداعى بالالارعا ارنالعان IQostanay smart ورتالىعىنىڭ قىزمەتىمەن دە تانىستى.
قازىرگى ۋاقىتتا مۇندا ەكى مىڭعا جۋىق وقۋشى قوسىمشا ءبىلىم الادى. وسكەلەڭ ۇرپاقتىڭ يگىلىگى ءۇشىن 24 ۇيىرمە جۇمىس ىستەيدى.
وقۋشىلار سارايىندا جوعارى تەحنولوگيالىق قۇرالدارمەن جابدىقتالعان كيبەرسپورت، ينجەنەريا، اۆيامودەلدەۋ كابينەتتەرى، جاڭارتىلاتىن ەنەرگيا كوزدەرى، حيميا جانە فيزيكا-تەحنيكالىق زەرتحانالارى، سونداي- اق ءماجىلىس، وقۋ جانە حورەوگرافيا زالدارى بار.
ورتالىقتاعى روبوت تەحنيكاسى، ينجەنەريا جانە اۆيامودەلدەۋ ۇيىرمەلەرىنە قاتىساتىن بالالار پرەزيدەنتكە ءوز جوبالارىن تانىستىرىپ، ۆيرتۋالدى زەرتحانادا تاجىريبە جاساپ كورسەتتى.
- بولاشاقتا ءوز ءبىلىم- بىلىكتەرىڭىزدى ىسكە اسىرۋعا مول مۇمكىندىك بار دەپ ويلايمىن. ويتكەنى مۇنىڭ ءبارى قازىرگى زاماندا، ەكونوميكادا جانە باسقا دا سالالاردا سۇرانىسقا يە. ءبىز ۋاقىت تالابىنا ساي تەحنولوگيانى مەڭگەرگەن ۇلتقا اينالۋىمىز قاجەت. ەلىمىزگە وتاندىق تەحنولوگيانى دامىتاتىن سىزدەر سەكىلدى ازاماتتار كەرەك، - دەدى مەملەكەت باسشىسى.
وقۋشىلار قاسىم-جومارت توقايەۆقا تەحنيكالىق ماماندىقتارعا ارنالعان ءبىلىم گرانتتارىن كوبەيتكەنى ءۇشىن راقمەت ايتتى.
اۆتور
باقىتگۇل اباي قىزى
اۆتور
باقىتگۇل اباي قىزى
