قاسىم-جومارت توقايەۆ قوسشى قالاسىنىڭ دامۋ جوسپارىمەن تانىستى
استانا. KAZINFORM - پرەزيدەنتكە ەلورداعا ىرگەلەس ورنالاسقان قوسشى قالاسىنىڭ ينفراقۇرىلىمدىق دامۋ جوسپارى تانىستىرىلدى.
قوسشى قالاسىنىڭ اكىمى گايدار قاسەنوۆتىڭ ايتۋىنشا، ەلدى مەكەنگە 2021 -جىلى وبلىستىق ماڭىزى بار قالا مارتەبەسى بەرىلگەننەن كەيىن تۇرعىندار سانى 110 مىڭ ادامعا جەتكەن.
جالپى قالانىڭ باس جوسپارى اياسىندا 1,5 ميلليون شارشى مەتر تۇرعىن ءۇي مەن 45 الەۋمەتتىك نىساننىڭ قۇرىلىسى جوسپارلانعان.
سوڭعى ەكى جىلدا قالادا ءۇش مەكتەپ پايدالانۋعا بەرىلدى. تاعى ءبىر مەكتەپ قۇرىلىسى اياقتالۋعا جاقىن. الداعى ۋاقىتتا «جايلى مەكتەپ» ۇلتتىق جوباسى اياسىندا ءۇش ءبىلىم وشاعىن، سونداي-اق ەكى بالاباقشا سالۋ كوزدەلگەن.
دەنساۋلىق ساقتاۋ سالاسىندا ءبىر مەملەكەتتىك ەمحانا، مەملەكەتتىك-جەكەمەنشىك ارىپتەستىك شەڭبەرىندە ەكى ەمحانا جۇمىس ىستەيدى.
قالا اكىمى قازىرگى كەزدە جەكەمەنشىك ينۆەستيتسيا ەسەبىنەن جانىندا 1000 كەلۋشىنى قابىلدايتىن ەمحاناسى بار 300 ورىندىق كوپبەيىندى ايماقتىق اۋرۋحانا سالىنىپ جاتقانىن جەتكىزدى.
جاڭا اۋرۋحانادا تەراپيا، ونكولوگيا، نيەۆرولوگيا جانە پەرزەنتاحانا بولىمشەلەرى بولادى. مەديتسينالىق مەكەمە تەك قوسشى حالقىنا عانا ەمەس، جاقىن ماڭداعى اۋدانداردىڭ تۇرعىندارىنا دا قىزمەت كورسەتەدى دەپ جوسپارلانىپ وتىر.
بيىل مامىر ايىندا «Alan» دەنە شىنىقتىرۋ-ساۋىقتىرۋ كەشەنى اشىلدى. كەشەندە بالالارعا جانە ەرەسەكتەرگە ارنالعان باسسەين، جاتتىعۋ جانە سپورت زالدارى بار.
ال قوسشى تۇرعىندارىنىڭ يگىلىگىنە كەلەسى جىلى بەرىلەتىن قوعامدىق مادەني-سپورت ورتالىعىندا ينتەراكتيۆتى ءبىلىم بەرۋ ءبولىمى، سپورت زالى، تەننيس، باسكەتبول، فۋتبول، ۆولەيبول الاڭدارى، كينوتەاتر، كورمە زالى، كىتاپحانا، ءدارىسحانا، امفتيتەاتر اشىلادى.
مەملەكەت باسشىسى قوسشى قالاسىندا قۇرىلىس جۇمىستارى قارقىن الا باستاعانىن ەسكەرە وتىرىپ، وبلىس اكىمىنە ەلدى مەكەندەگى ينجەنەرلىك-كوممۋنالدىق ينفراقۇرىلىمدى دامىتۋ جانە گاز قۇبىرىن تارتۋ ماسەلەلەرىنە ايرىقشا ءمان بەرۋدى تاپسىردى.
اۆتور
اسحات رايقۇل
