قاسىم-جومارت توقايەۆ: ەنەرگەتيكا سەكتورى ەكى ەل ەكونوميكاسىنىڭ نەگىزگى قوزعاۋشى كۇشى

دوحا. KAZINFORM - قازاق-قاتار ينۆەستيتسيالىق دوڭگەلەك ۇستەلىندە قاسىم-جومارت توقايەۆ قازاقستان مۇناي جانە گاز قورىن بارلاۋ ءۇشىن مول مۇمكىندىكتەر ۇسىنۋعا دايىن ەكەنىن ايتتى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

- ءبىز ماڭىزدى كەن ورىندارىن اشۋ ءۇشىن الەمدەگى ۇزدىك تاجىريبەلەردى ەنگىزىپ جاتىرمىز. وسىعان وراي ەنەرگەتيكا سالاسىنداعى قاتار كومپانيالارىن گەولوگيالىق بارلاۋ، مۇناي حيمياسى، مۇناي مەن گازدى تاسىمالداۋ، وڭدەۋ جوبالارىنا بەلسەندى اتسالىسۋعا شاقىرامىن. بۇگىن Power International Holding كومپانياسىمەن قاشاعان كەن ورنىندا گاز وڭدەۋ زاۋىتتارىنىڭ، سونداي-اق بەينەۋ-بوزوي-شىمكەنت جانە اقتوبە-قوستاناي گاز قۇبىرلارىنىڭ قۇرىلىسى تۋرالى كەلىسىمدەرگە قول قويۋ جوسپارلانىپ وتىر. بۇل - كەلەشەگى زور باستاما. قاشاعاندا تاعى ءبىر گاز وڭدەۋ زاۋىتىن سالۋعا قاتىستى كەلىسسوزدەر كوپ ۇزاماي ناقتى ناتيجە بەرەدى دەپ ۇمىتتەنەمىز، - دەدى قازاقستان پرەزيدەنتى.

سونىمەن قاتار مەملەكەت باسشىسى جاڭارتىلاتىن ەنەرگيا سەكتورىنداعى ىقپالداستىق ماسەلەسىنە ارنايى توقتالدى. قازاقستاننىڭ ءبىر تريلليون-كيلوۆاتقا باعالانعان جاڭارتىلاتىن ەنەرگيا كوزدەرىنىڭ الەۋەتى وسى سالاداعى جاھاندىق ويىنشىلاردىڭ نازارىن اۋداردى. جالپى العاندا، ولار 43 گيگاۆاتت قۋات وندىرەتىن بىرنەشە جوبانى جۇزەگە اسىرۋعا مىندەتتەمە الدى.

- Nebras Power كومپانياسىنىڭ قازاقستاندا قۋاتى 350 مەگاۆاتت بولاتىن سۋ ەلەكتر ستانتسياسىن سالۋ نيەتىن، سونداي-اق Pearl Overseas كومپانياسىنىڭ قۋاتى 1,1 گيگاۆاتت بولاتىن بۋ-گاز قوندىرعىسىن ورناتۋ جوسپارىن جوعارى باعالايمىز. ءبىز وسى اسا ماڭىزدى سەكتورداعى ءوندىرىس، تەحنولوگيا ترانسفەرتى جانە تاجىريبە الماسۋ باعىتتارى بويىنشا سەرىكتەستىكتى جالعاستىرۋعا مۇددەلىمىز، - دەدى پرەزيدەنت.