قاسىم-جومارت توقايەۆ پەن نيكول پاشينيان ب ا ق وكىلدەرى ءۇشىن بريفينگ وتكىزدى

ەرەۆان. KAZINFORM - مەملەكەت باسشىسى ەريەۆانعا قازاقستان پرەزيدەنتى رەتىندە رەسمي ساپارمەن العاش رەت كەلىپ وتىرعانىن اتاپ ءوتىپ، ىستىق ىقىلاسپەن قارسى العانى ءۇشىن بارشا ارميان حالقىنا العىس ايتتى.

سونداي-اق ەلىمىز ارمەنيانىڭ كونە تاريحىنا، باي مادەنيەتى مەن سالت-داستۇرىنە ەرەكشە قۇرمەتپەن قارايتىنىن جەتكىزدى.

قاسىم-جومارت توقايەۆ ارمەنيانى قازاقستاننىڭ وڭتۇستىك كاۆكازداعى وتە ماڭىزدى ءارى سەنىمدى سەرىكتەسى رەتىندە اتاپ ءوتتى.

- ءبىزدىڭ قارىم-قاتىناسىمىز مىزعىماس دوستىققا جانە ءوزارا قولداۋعا نەگىزدەلگەن. ەكىجاقتى بايلانىستى جانداندىرۋ - ورتاق ماقساتىمىز. ءبىزدىڭ ايماقتىق جانە حالىقارالىق قاۋىپسىزدىكتى، ءوزارا ىقپالداستىقتى نىعايتۋ جولىنداعى مۇراتىمىز - ءبىر. بيىل ەكى ەل اراسىنداعى دوستىق جانە ىنتىماقتاستىق تۋرالى شارتقا 25 جىل تولدى. وسى ۋاقىت ىشىندە استانا مەن ەريەۆان اراسىندا ۇزاق مەرزىمگە ارنالعان ءوزارا ءتيىمدى سەرىكتەستىكتىڭ بەرىك نەگىزى قالاندى. ءبىز ارمەنيامەن جان-جاقتى ارىپتەستىكتى ودان ءارى دامىتۋعا مۇددەلىمىز. سوندىقتان مەن ءۇشىن بۇگىنگى ساپاردىڭ ءمان-ماڭىزى ايرىقشا، - دەدى پرەزيدەنت.

مەملەكەت باسشىسىنىڭ پىكىرىنشە، بۇگىنگى كەلىسسوزدەر ەكى ەلدىڭ جوعارى دەڭگەيدەگى ىنتىماقتاستىعىن ساقتاۋعا مۇددەلى ەكەنىن دالەلدەيدى.

- بۇگىن كۇن تارتىبىندەگى كوپتەگەن وزەكتى ماسەلە جان-جاقتى تالقىلاندى. ءبىز ناقتى كەلىسىمدەرگە قول جەتكىزدىك. پاشينيان مىرزا بۇل تۋرالى جاڭا عانا تولىعىمەن ايتتى. اسىرەسە، ساۋدا- ەكونوميكا جانە ينۆەستيتسيا سالاسىنداعى بايلانىستىڭ اۋقىمىن كەڭەيتۋگە ەرەكشە نازار اۋداردىق. ەكىجاقتى ساۋدا-ساتتىقتىڭ كولەمى سوڭعى بەس جىلدا تۇراقتى ءوسىپ كەلەدى، - دەدى قاسىم-جومارت توقايەۆ.

مەملەكەت باسشىسى ەكى ەل اراسىنداعى جان-جاقتى قارىم-قاتىناستى نىعايتۋ ءۇشىن مول الەۋەت بار ەكەنىنە نازار اۋداردى.

- تاۋار اينالىمىن ۇلعايتۋعا سەرپىن بەرەتىن جاڭا باعىتتاردى ىزدەستىرۋ كەرەك دەگەن ورتاق پىكىرگە كەلدىك. ەكسپورتتىق-يمپورتتىق تاۋارلار نومەنكلاتۋراسىن كەڭەيتۋ ءۇشىن ناقتى شارالار قابىلداۋىمىز كەرەك. ول ءۇشىن قولدا بار مۇمكىندىكتى بارىنشا ءتيىمدى پايدالانۋ قاجەت. قازاقستان ارمەنياعا شىعارىلاتىن ەكسپورت كولەمىن 350 ميلليون دوللارعا جەتكىزۋگە دايىن، - دەدى پرەزيدەنت.

قاسىم-جومارت توقايەۆ ونەركاسىپ، قۇرىلىس، كولىك-لوگيستيكا، اۋىل شارۋاشىلىعى، قارجى، يننوۆاتسيا، تۋريزم جانە باسقا دا سالالارداعى ىنتىماقتاستىقتى جانداندىرۋ ماڭىزدى ەكەنىن ايتىپ، ارميان تاراپىنا ءبىرقاتار بىرلەسكەن ينۆەستيتسيالىق جوبانى جۇزەگە اسىرۋدى ۇسىندى.

- بۇل، اسىرەسە، قازىرگى كۇردەلى گەوساياسي جانە گەوەكونوميكالىق احۋال كەزىندە اسا وزەكتى. وسى باعىتتاعى جۇمىس ۇكىمەتارالىق كوميسسيانىڭ ءجىتى باقىلاۋىندا بولادى. بۇعان قوسا بيزنەس-ميسسيالاردىڭ بارىس-كەلىسىن جانداندىرا ءتۇسۋىمىز كەرەك. بۇل قادام ىسكەرلىك كەڭەستىڭ تەز ارادا قۇرىلۋىنا ىقپال ەتەدى، ەكى ەلدىڭ بيزنەس وكىلدەرى اراسىنداعى بايلانىستى كۇشەيتەدى. سونداي-اق ينۆەستيتسيالىق قارىم-قاتىناستى جاقسارتۋعا مۇمكىندىك بەرەدى، - دەدى قاسىم-جومارت توقايەۆ.

پرەزيدەنت ءوزارا ءتيىمدى ىنتىماقتاستىقتى نىعايتۋ ءۇشىن كولىك جانە لوگيستيكا سالاسىنىڭ ماڭىزدىلىعىنا توقتالىپ، قازاقستان ارمەنيانىڭ وڭتۇستىك كاۆكازداعى كولىك بايلانىسىن قايتا جانداندىرۋعا ۇمتىلىسىن جوعارى باعالايتىنىن جەتكىزدى.

- بۇل رەتتە قۇرمەتتى پرەمەر-مينيستر نيكول پاشينياننىڭ «بەيبىتشىلىك تورابى» باستاماسىنا وڭ كوزقاراسپەن قارايمىز. سونىمەن قاتار ءبىز ەكى ەلدىڭ استاناسى مەن باسقا دا قالالارى اراسىندا تىكەلەي اۋە رەيستەرىن اشۋ تۋرالى باستامانى قولدادىق. اگروونەركاسىپ سالاسىنداعى تاۋار ءتۇرىن كوبەيتۋ جانە ولاردى جەتكىزۋ ماسەلەلەرىن تالقىلادىق. سونداي-اق سيفرلىق تەحنولوگيا بويىنشا ىنتىماقتاستىقتى دامىتۋ قاجەت. قازاقستان ارمەنيالىق سەرىكتەستەرىمەن وسى ماڭىزدى سالادا بىرلەسكەن جوبالاردى جۇزەگە اسىرۋدى كوزدەپ وتىر، - دەدى مەملەكەت باسشىسى.

قاسىم-جومارت توقايەۆ ەلىمىزدىڭ ارمەنيامەن مادەني-گۋمانيتارلىق بايلانىستى نىعايتۋعا باسا ءمان بەرەتىنىن ايتتى.

- بيىل قازاقستاندا ارمەنيانىڭ مادەنيەت كۇندەرى وتەدى. بۇل ماڭىزدى ءىس-شارا حالىقتارىمىزدى جاقىنداتا تۇسەتىنى ءسوزسىز. اسىرەسە، رۋحاني بايلانىستارىمىزدى جانداندىرماق. سونداي- اق قۇرمەتتى ارمەنيا پرەمەر-مينيسترىمەن ەريەۆان قالاسى كوشەلەرىنىڭ بىرىنە ۇلى ابايدىڭ ەسىمىن بەرۋ تۋرالى كەلىسىمگە كەلدىك. ال استانانىڭ ءبىر كوشەسىنە ارميان ءالىپبيىنىڭ نەگىزىن قالاۋشى، اۋليە مەسروپ ماشتوتستىڭ اتى بەرىلەتىن بولدى. وعان قوسا ارميان قارپىمەن جازىلعان قىپشاق تىلىندەگى قولجازبالاردى زەرتتەيتىن عىلىمي توپ قۇرۋ تۋرالى باستامانى قۇپتادىق. ونى ەۋرازيا ۇلتتىق ۋنيۆەرسيتەتى جانە ەريەۆان مەملەكەتتىك ۋنيۆەرسيتەتى بىرلەسىپ جۇزەگە اسىرادى، - دەدى پرەزيدەنت.

قاسىم-جومارت توقايەۆ ارميان سپورتشىلارىن بيىل قىركۇيەكتە قازاقستاندا وتەتىن بەسىنشى دۇنيەجۇزىلىك كوشپەندىلەر ويىندارىنا قاتىسۋعا شاقىردى.

قاسىم-جومارت توقايەۆ ارمەنيا پرەمەر-مينيسترىمەن كەلىسسوزدەر بارىسىندا ايماقتىق جانە جاھاندىق كۇن تارتىبىندەگى وزەكتى ماسەلەلەر جونىندە پىكىر الماسقانىن مالىمدەدى.

- قازاقستان مەن ارمەنيا كوپجاقتى قۇرىلىمدار اياسىندا ءتيىمدى ىنتىماقتاستىقتى جالعاستىرىپ كەلەدى. ەلدەرىمىزدىڭ وڭىرلىك جانە حالىقارالىق دەڭگەيدەگى كوپتەگەن وزەكتى ماسەلەلەرگە قاتىستى ۇستانىمدارى - ۇقساس. باستامالارىمىزعا ءوزارا قولداۋ ءبىلدىرۋ داستۇرگە اينالدى. مۇنى زور ريزاشىلىقپەن اتاپ وتكىم كەلەدى، - دەدى پرەزيدەنت.

بۇدان سوڭ مەملەكەت باسشىسى وڭتۇستىك كاۆكازدا بەيبىتشىلىككە قول جەتكىزۋ جونىندەگى كۇش-جىگەرگە ءوز ۇلەسىن قوسۋعا قازاقستاننىڭ دايىن ەكەنىن مالىمدەدى.

- ءبىز الداعى ۋاقىتتا دا بىرلەسە جۇمىس ىستەۋگە، بەيبىتشىلىك پەن تۇراقتىلىقتى نىعايتۋ ۇدەرىسىنە بەلسەنە اتسالىسۋعا كەلىستىك. ءبىز ارمەنيا مەن ازەربايجاننىڭ بەيبىتشىلىك شارتىن جاساۋعا ۇمتىلىسىن تولىق قۇپتايمىز. قۇرمەتتى پرەمەر-مينيستر مىرزا جاڭا عانا ايتقانداي، قازاقستان بارىنشا قولداۋ كورسەتىپ، ىزگى قىزمەتتەر ميسسياسىن قولعا الۋعا دايىن. ياعني، ەكى ەل اراسىنداعى كەلىسسوزدەردى جۇرگىزۋ ءۇشىن ءوز الاڭىن ۇسىنادى. ەڭ باستى ماقساتىمىز - ءبىزدىڭ دوستاس ەلدەرىمىزدى جاقىنداستىرىپ، مىزعىماس تاتۋ كورشىلىككە، ايماقتاعى بەيبىتشىلىك پەن تۇراقتى دامۋعا جول اشۋ، - دەدى پرەزيدەنت.

مەملەكەت باسشىسى بۇگىنگى كەلىسسوزدەردىڭ ءوزارا سەنىم جانە تۇسىنىستىك رۋحىندا وتكەنىنە توقتالىپ، بۇل ساپار ەكى ەلدىڭ قارىم-قاتىناسىنا تىڭ سەرپىن بەرەتىنىنە سەنىم ءبىلدىردى.

ءسوز سوڭىندا پرەزيدەنت قاسىم-جومارت توقايەۆ نيكول پاشينياندى قازاقستانعا رەسمي ساپارمەن كەلۋگە شاقىردى.

ارمەنيا پرەمەر-ءمينيسترى بۇگىنگى كەلىسسوزدەر بارىسىندا قول جەتكىزىلگەن ۋاعدالاستىقتاردىڭ ماڭىزدىلىعىن اتاپ ءوتتى.

- ءبىزدىڭ جوعارى دەڭگەيدەگى ديالوگىمىز جاڭا عانا قول قويعان بىرلەسكەن مالىمدەمە ارقىلى راستالدى. مۇنىڭ ەكىجاقتى قارىم- قاتىناستارىمىزدى ودان ءارى دامىتۋدا ماڭىزى زور. شىنايى ءارى ءوزارا ءتيىمدى بايلانىستاردى نىعايتۋ جونىندەگى ۇستانىمى ءۇشىن قازاق دەلەگاتسياسىنا العىس ايتامىن. ءبىز كوپجاقتى كۇن ءتارتىبىن ودان ءارى كەڭەيتۋ مۇمكىندىكتەرىن ايقىندادىق. سونداي- اق جاڭا جوبالاردى، سونىڭ ىشىندە كولىك جانە لوگيستيكا سالاسىنداعى ىنتىماقتاستىقتى ودان ءارى وركەندەتۋ پەرسپەكتيۆالارىن ناقتىلادىق. ءبىز تاۋار اينالىمىنىڭ تۇراقتى وسىمىنە قاراماستان، ساۋدا-ەكونوميكالىق ىنتىماقتاستىقتى دامىتۋ ءۇشىن الەۋەتىمىزدىڭ تولىق پايدالانىلماي وتىرعانىمەن كەلىسەمىز، - دەدى ارمەنيا ۇكىمەتىنىڭ باسشىسى.