قاسىم-جومارت توقايەۆ پەن ناتاشا پيرتس- مۋسار شاعىن قۇرامدا كەلىسسوز جۇرگىزدى
استانا. KAZINFORM - «اقوردا» رەزيدەنتسياسىندا قازاقستانعا رەسمي ساپارمەن كەلگەن سلوۆەنيا پرەزيدەنتى ناتاشا پيرتس- مۋساردى سالتاناتتى قارسى الۋ ءراسىمى ءوتتى، دەپ حابارلايدى اقوردانىڭ باسپا ءسوز قىزمەت.
پرەزيدەنتتەر ءبىر- بىرىنە دەلەگاتسيا مۇشەلەرىن تانىستىردى. بۇدان كەيىن قۇرمەت قاراۋىلىنىڭ باستىعى راپورت بەرىپ، قازاقستان مەن سلوۆەنيانىڭ مەملەكەتتىك ءانۇراندارى شىرقالدى.
سالتاناتتى راسىمنەن كەيىن مەملەكەتتەر باسشىلارى كەلىسسوز زالىنا باردى.
قاسىم-جومارت توقايەۆ مارتەبەلى مەيمانعا ءىلتيپات ءبىلدىرىپ، ونىڭ ساپارى قازاقستان- سلوۆەنيا سەرىكتەستىگىن تەرەڭدەتۋگە سەپتىگىن تيگىزىپ، كەڭ مۇمكىندىكتەرگە جول اشاتىنىن ايتتى.
- سلوۆەنيامەن تىعىز ىنتىماقتاستىق قۇرۋعا نيەتتىمىز. بۇل - انىق. پرەزيدەنت رەتىندە ءوزارا مۇددەمىزگە ساي كەلەتىن بارلىق سالاداعى بايلانىستى نىعايتۋعا كۇش-جىگەرىمدى سالامىن. ءبىز سلوۆەنيانى قازاقستاننىڭ بالقان تۇبەگىندەگى نەگىزگى جانە وتە ماڭىزدى سەرىكتەستەرىنىڭ ءبىرى رەتىندە قاراستىرامىز. ءسىزدىڭ ەلدىڭ بيزنەس وكىلدەرىنە جانە ۇكىمەتىڭىزگە ءبىرقاتار ۇتىمدى جوبا ۇسىنا الامىز، - دەدى مەملەكەت باسشىسى.
پرەزيدەنتتىڭ ايتۋىنشا، سلوۆەنيانىڭ قازاقستان ەكونوميكاسىنا سالعان تىكەلەي ينۆەستيتسياسىنىڭ كولەمى 200 ميلليون دوللارعا جۋىقتادى. ەلىمىزدەگى فارماتسيەۆتيكا، ماشينا جاساۋ، تەلەكوممۋنيكاتسيا جانە جاڭارتىلاتىن ەنەرگيا كوزدەرى سالالارىندا سلوۆەنيا كاپيتالىنىڭ ۇلەسى بار 19 كومپانيا كاسىبىن تابىستى جۇرگىزىپ كەلەدى. بۇدان بولەك، قازاقستان مەن سلوۆەنيانىڭ كولىك-لوگيستيكا، تسيفرلاندىرۋ جانە يننوۆاتسيا، دەنساۋلىق ساقتاۋ، تۋريزم باعىتتارىندا ءوزارا سەرىكتەستىكتى ارتتىرۋعا الەۋەتى زور.
سلوۆەنيا پرەزيدەنتى وزىنە جانە دەلەگاتسياسىنا قوناقجايلىق تانىتقانى ءۇشىن قاسىم-جومارت توقايەۆقا شىنايى ريزاشىلىعىن جەتكىزدى.
- ديپلوماتيالىق قارىم-قاتىناس ورناعان 33 جىل ىشىندە ەكى ەل اراسىندا بىردە ءبىر شەشىلمەگەن ماسەلە بولعان ەمەس. مۇنىڭ ەكونوميكالىق ىنتىماقتاستىقتى كەڭەيتۋگە، وركەندەتۋگە مول مۇمكىندىك بەرەتىنىن دۇرىس اتاپ ءوتتىڭىز. سوندىقتان وزىممەن بىرگە بيزنەس وكىلدەرىنىڭ ۇلكەن دەلەگاتسياسىن الىپ كەلدىم. ولار قازاقستاندىق ارىپتەستەرمەن بىرگە سەرىكتەستىكتى ىلگەرىلەتۋگە قاتىستى باعىتتاردى تالقىلاپ جاتىر. ەكونوميكالىق ىقپالداستىعىمىز ارتىپ كەلەدى. دەگەنمەن بۇدان دا زور جەتىستىكتەرگە جەتەمىز دەپ ويلايمىن. پرەزيدەنتتەر مەن ساياساتكەرلەر اراسىنداعى بايلانىستار ءارقاشان بولاشاققا باعدارلانادى. ويتكەنى ساياساتكەرلەر بيزنەستىڭ كوكجيەگىن كەڭەيتەدى، - دەدى ناتاشا پيرتس- مۋسار.
سونداي-اق كەلىسسوز بارىسىندا تاراپتار جاھاندىق جانە وڭىرلىك كۇن تارتىبىندەگى وزەكتى ماسەلەلەر بويىنشا جان-جاقتى پىكىر الماستى.
