قاسىم-جومارت توقايەۆ پەن ەممانيۋەل ماكرون كەڭەيتىلگەن قۇرامدا كەلىسسوز جۇرگىزدى

قاسىم-جومارت توقايەۆ پەن ەممانيۋەل ماكرون ەكى مەملەكەتتىڭ رەسمي دەلەگاتسيالارىنىڭ قاتىسۋىمەن كەڭەيتىلگەن قۇرامدا كەلىسسوز جۇرگىزدى، دەپ حابارلايدى Kazinform اقورداعا سىلتەمە جاساپ.

مەملەكەت باسشىسى فرانسيا پرەزيدەنتىنىڭ استاناعا العاشقى ساپارى ەكىجاقتى قارىم-قاتىناستى دامىتۋعا تىڭ سەرپىن بەرەتىنىن جانە كوپجاقتى ىنتىماقتاستىقتى مۇلدە جاڭا دەڭگەيگە شىعارۋعا مۇمكىندىك جاسايتىنىن اتاپ ءوتتى.

- فرانسيا - قازاقستاننىڭ ەۋروپا وداعىنداعى ماڭىزدى ءارى سەنىمدى سەرىكتەسى. بىلتىر ءوزارا تاۋار اينالىمى 30 پايىزعا ءوسىپ، 4 ميلليارد دوللارعا جەتتى. بيىلعى سەگىز ايدا ەكىجاقتى ساۋدا-ساتتىق كولەمى وتكەن جىلمەن سالىستىرعاندا 21 پايىزعا ارتتى، ياعني 2,7 ميلليارد دوللاردى قۇرادى، - دەدى پرەزيدەنت.

مەملەكەت باسشىسىنىڭ ايتۋىنشا، فرانسيا بۇعان دەيىن ەل ەكونوميكاسىنا شامامەن 18,7 ميلليارد دوللارعا جۋىق ينۆەستيتسيا سالعان. ەنەرگەتيكا، قۇرىلىس، اەروعارىش، فارماتسيەۆتيكا، تاۋ-كەن جانە حيميا ونەركاسىبى، ماشينا جاساۋ سالالارىندا بىرلەسكەن جوبالار جۇزەگە اسىرىلىپ جاتىر.

وسى رەتتە قاسىم-جومارت توقايەۆ ەممانيۋەل ماكروننىڭ ءوزارا ءتيىمدى قارىم-قاتىناستاردى دامىتۋعا قوسقان جەكە ۇلەسىن ەرەكشە اتاپ ءوتىپ، ەكى ەل حالىقتارىنىڭ يگىلىگى جولىنداعى ىنتىماقتاستىقتى ودان ءارى نىعايتۋعا قازاقستاننىڭ دايىن ەكەنىن جەتكىزدى.

كەلىسسوز بارىسىندا تاراپتار جاسىل ەنەرگەتيكا، لوگيستيكا، ترانزيت، اۋىل شارۋاشىلىعى، دەنساۋلىق ساقتاۋ، سيفرلاندىرۋ جانە ءبىلىم بەرۋ سالالارىنداعى الداعى ىقپالداستىقتىڭ باسىم باعىتتارىن ايقىندادى.

مەملەكەت باسشىسى مادەني بايلانىستاردى دامىتۋعا ەرەكشە نازار اۋدارىپ، فرانسۋز مادەنيەتى مەن ءتىلىن قازاقستاندا ىلگەرىلەتۋ قاجەت ەكەنىن ايتتى.

ءوز كەزەگىندە ەممانيۋەل ماكرون ەكى ەل اراسىنداعى ستراتەگيالىق ارىپتەستىك تۋرالى كەلىسىمنىڭ قابىلدانعانىنا 15 جىل تولعانىن اتاپ ءوتىپ، فرانسيانىڭ ءوزارا مۇددەنى كوزدەيتىن ءتۇرلى سالاداعى ەكىجاقتى بايلانىستاردى ودان ءارى نىعايتۋعا نيەتتى ەكەنىن راستادى.

- ەكىجاقتى ەكونوميكالىق قارىم-قاتىناستار، سونىڭ ىشىندە اۋىل شارۋاشىلىعى، ەنەرگەتيكا، جاڭارتىلاتىن ەنەرگەتيكا سالالارىنداعى بايلانىستار الداعى ۋاقىتتا تىڭ سەرپىنمەن داميدى دەپ ويلايمىن. ءبىز بۇرىنعى جوبالارعا دا، جاڭا باستامالارعا دا ينۆەستيتسيا سالۋدى قولدايمىز. بۇگىن وتە وزەكتى ماسەلەلەردى تالقىلادىق. بۇدان بولەك مادەني-گۋمانيتارلىق ىنتىماقتاستىعىمىز دا قارقىندى دامىپ كەلەدى. ءبىلىم-عىلىم سالالارىندا ناقتى كەلىسىم بار. 2024-جىلدىڭ قىركۇيەك ايىنان باستاپ قازاق-فرانسۋز ۋنيۆەرسيتەتى ءوز جۇمىسىن باستايدى، - دەدى فرانسيا پرەزيدەنتى.

سونىمەن قاتار ەكى ەل باسشىلارى وڭىرلىك جانە جاھاندىق كۇن تارتىبىندەگى نەگىزگى ماسەلەلەرگە قاتىستى تۇراقتى قارىم-قاتىناستىڭ ماڭىزدىلىعىنا نازار اۋدارىپ، حالىقارالىق ۇيىمدار اياسىنداعى ديالوگتى تەرەڭدەتۋ قاجەت ەكەنىن اتاپ ءوتتى.