قاسىم-جومارت توقايەۆ موڭعولياعا بارادى
استانا. KAZINFORM - قاسىم-جومارت توقايەۆ موڭعوليا پرەزيدەنتى ۋحنااگين حۋرەلسۋحپەن كەزدەستى. قازاقستان پرەزيدەنتى «ش ى ۇ پليۋس» فورماتىنداعى وتىرىستىڭ تابىستى وتۋىنە كونسترۋكتيۆتى ۇلەس قوسقانى ءۇشىن ۋحنااگين حۋرەلسۋحقا ريزاشىلىعىن ءبىلدىردى.
مەملەكەت باسشىسىنىڭ ايتۋىنشا، موڭعوليا - ەلىمىزدىڭ ازياداعى ەڭ ماڭىزدى سەرىكتەستەرىنىڭ ءبىرى.
ءبىزدى عاسىرلار قويناۋىنان تامىر تارتاتىن ورتاق مادەني-تاريحي قۇندىلىقتار مەن داستۇرلەر بايلانىستىرادى.
- قازاقستان مەن موڭعوليانىڭ ىنتىماقتاستىعى ءوزارا قۇرمەت پەن قولداۋ رۋحىندا ۇدايى نىعايىپ كەلەدى. ەلدەرىمىز اراسىندا سەنىمدى جانە سىندارلى ساياسي ديالوگ جولعا قويىلعان. اۋقىمدى شارتتىق- قۇقىقتىق بازا قالىپتاسقان، مادەني-گۋمانيتارلىق بايلانىستار كەڭەيۋدە. ورايلى ءساتتى پايدالانىپ، قازاقستانداعى بۇرىن-سوڭدى بولماعان سۋ تاسقىنى كەزىندە قولداۋ كورسەتكەندەرىڭىز ءۇشىن سىزگە جانە بارشا موڭعول حالقىنا ريزاشىلىعىمدى بىلدىرەمىن، - دەدى قاسىم-جومارت توقايەۆ.
كەزدەسۋ بارىسىندا ساۋدا-ەكونوميكالىق ىنتىماقتاستىق، تاۋار اينالىمىن ۇلعايتۋ، كولىك-ترانزيت الەۋەتىن ارتتىرۋ پەرسپەكتيۆالارى تالقىلاندى.
پرەزيدەنتتىڭ ايتۋىنشا، قولدا بار مۇمكىندىكتەردى تولىق پايدالانۋ ءۇشىن ەكى ەل ۇكىمەتتەرى ساۋدا-ەكونوميكالىق ىقپالداستىقتىڭ جاڭا باعىتتارىن ىزدەگەنى ءجون.
- قازاقستاننىڭ موڭعولياعا شيكىزاتتىق ەمەس تاۋارلار بويىنشا ەكسپورتتىق الەۋەتى شامامەن 100 ميلليون دوللاردى قۇرايدى. وسىعان وراي تاۋار اينالىمىن 500 ميلليون دوللارعا دەيىن ۇلعايتۋ جونىندە ناقتى ماقسات قويۋدى ۇسىنامىن. بۇل رەتتە ءبىز قازاق-موڭعول ىسكەرلىك كەڭەسىن قۇرۋعا جانە ساۋدا-ەكونوميكالىق ىنتىماقتاستىقتى جانداندىرۋ جونىندەگى جول كارتاسىن قابىلداۋعا مۇددەلىمىز، - دەدى پرەزيدەنت.
قاسىم-جومارت توقايەۆ قازاقستان مەن موڭعوليا اراسىنداعى اۋە رەيستەرىنىڭ سانىن ارتتىرۋ قاجەت ەكەنىن ايتتى.
سونداي-اق ەكى ەل اراسىنداعى جول ءجۇرۋ ۋاقىتىن ەداۋىر قىسقارتاتىن اۆتوموبيل جولىن سالۋ مۇمكىندىگىن قاراستىرۋعا شاقىردى.
موڭعوليا پرەزيدەنتى قازاقستانداعى ساياسي جانە الەۋمەتتىك-ەكونوميكالىق رەفورمالاردىڭ ناتيجەسىن جوعارى باعالادى.
سونداي-اق استانانىڭ حالىقارالىق ارەناداعى ءرولى نىعايىپ كەلە جاتقانىن اتاپ ءوتتى. ونىڭ ايتۋىنشا، ەكى ەل ورتاق قۇندىلىقتار مەن تاريحي تامىرلاستىققا نەگىزدەلگەن كوپجاقتى ىنتىماقتاستىقتى دامىتۋعا ءتيىس.
ۋحنااگين حۋرەلسۋح قاسىم-جومارت توقايەۆتى موڭعولياعا مەملەكەتتىك ساپارمەن كەلۋگە شاقىردى.
قازاقستان پرەزيدەنتى بۇل شاقىرۋدى زور ىقىلاسپەن قابىل الاتىنىن ايتتى. ونىڭ پىكىرىنشە، الداعى ساپار ەكىجاقتى قاتىناستاردىڭ جىلناماسىنداعى جاڭا كەزەڭگە جول اشادى.
بۇدان بولەك، ەكى ەل باسشىلارى كوپجاقتى قۇرىلىمدار اياسىنداعى ىقپالداستىق ماسەلەلەرى جونىندە پىكىر الماستى.
