قاسىم-جومارت توقايەۆ ماجارستان پرەزيدەنتى كاتالين نوۆاكپەن جۇزدەستى
قاسىم-جومارت توقايەۆتىڭ ب ۇ ۇ باس اسسامبلەياسى 78-سەسسياسىنىڭ اياسىنداعى ەكىجاقتى كەلىسسوزدەر باعدارلاماسى ماجارستان پرەزيدەنتى كاتالين نوۆاكپەن كەزدەسۋدەن باستالدى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
مەملەكەت باسشىسى باۋىرلاس حالىقتار اراسىندا تاريحي جانە مادەني بايلانىستارعا نەگىزدەلگەن ستراتەگيالىق سەرىكتەستىك ورناعانىن اتاپ ءوتتى.
پرەزيدەنت ماجارستاننىڭ تۇركى ىنتىماقتاستىعىن نىعايتۋداعى بەلسەندى ۇستانىمىن جانە ەلەۋلى ۇلەسىن جوعارى باعالادى.
قاسىم-جومارت توقايەۆ بيىل قاراشا ايىندا قازاقستاندا تۇركى مەملەكەتتەرى ۇيىمىنىڭ مەرەيتويلىق 10-سامميتى وتەتىنىن ايتىپ، اتالعان جيىنعا ماجارستان پرەمەر-ءمينيسترى ۆيكتور وربان قاتىسادى دەپ جوسپارلانىپ وتىرعانىن جەتكىزدى.
«ەلىمىزدىڭ ماجارستانمەن تىعىز ىنتىماقتاستىق ورناتقانىن اتاپ وتكىم كەلەدى. ەلدەرىمىز اراسىندا وتە سەنىمدى، ءداستۇرلى بايلانىس قالىپتاسقان. ءبىز ەكىجاقتى ىنتىماقتاستىقتىڭ قازىرگى دەڭگەيىن جوعارى باعالايمىز. وسى ءساتتى پايدالانىپ، ءسىزدى قازاقستانعا ساپارمەن كەلۋگە شاقىرامىن. سونىمەن قاتار تۇركى مەملەكەتتەرى ۇيىمىنىڭ سامميتىندە پرەمەر-مينيستر ۆيكتور وربان مىرزامەن كەزدەسەمىز دەپ ۇمىتتەنەمىن»، - دەدى مەملەكەت باسشىسى.
كەلىسسوز بارىسىندا تاراپتار ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىق ماسەلەلەرىن تالقىلادى.
مەملەكەت باسشىسى ەكى ەل اراسىنداعى بايلانىستاردى نىعايتۋ ماقساتىندا استانا كوشەلەرىنىڭ بىرىنە ماجارستاننىڭ ۇلت اقىنى شاندور پەتەفيدىڭ ەسىمى بەرىلەتىنىن ايتتى.
پرەزيدەنتتەر مەملەكەتتەرىمىز اراسىنداعى ءوزارا تاۋار اينالىمىن ۇلعايتۋعا باعىتتالعان بىرلەسكەن شارالار قابىلداۋ، سونداي-اق ىنتىماقتاستىقتىڭ ەكىجاقتى تەتىكتەرىن جانداندىرۋ ماڭىزدى ەكەنىن اتاپ ءوتتى.
تاراپتار حالىقارالىق ماسەلەلەر، ونىڭ ىشىندە جاھاندىق تۇراقتىلىق پەن ورنىقتى دامۋدى قامتاماسىز ەتۋ ءۇشىن كوپجاقتى ينستيتۋتتاردىڭ جۇمىسىن جەتىلدىرۋگە قاتىستى شارالار جونىندە پىكىر الماستى.
