قاسىم-جومارت توقايەۆ ەلىمىزدىڭ باس پوليتسەيى ەرجان سادەنوۆتى قابىلدادى

استانا. KAZINFORM - مەملەكەت باسشىسى ىشكى ىستەر ءمينيسترى ەرجان سادەنوۆتى قابىلدادى.

ەرجان سادەنوۆ ەلىمىزدە «زاڭ جانە ءتارتىپ» قاعيداتىن ورنىقتىرۋ، كەز كەلگەن قۇقىق بۇزۋشىلىققا مۇلدەم توزبەۋشىلىك جاعدايىن قالىپتاستىرۋ ماقساتىندا جۇرگىزىلىپ جاتقان جۇمىستار جونىندە ەسەپ بەردى.

ۆەدومستۆو ءوز قىزمەتى بارىسىندا مەملەكەت باسشىسىنىڭ ىشكى ىستەر مينيسترلىگىنىڭ كەڭەيتىلگەن القا وتىرىسىندا بەرگەن تاپسىرمالارىنا سايكەس قۇقىق بۇزۋشىلىقتىڭ الدىن الۋ جانە ازاماتتاردىڭ قۇقىقتىق ساۋاتىن ارتتىرۋ ماسەلەلەرىنە باسا ءمان بەرىپ وتىرعانىن باياندادى.

سونىڭ ناتيجەسىندە جىل باسىنان بەرى قىلمىس دەڭگەيى تومەندەگەن، ۇرلىق، توناۋ، قاراقشىلىق، سونداي-اق وتباسىلىق-تۇرمىستىق جانە كوشەدە جاسالعان قىلمىستار، كامەلەتكە تولماعان جانە بۇرىن سوتتالعان ازاماتتار ىستەگەن قىلمىستار ايتارلىقتاي ازايعان.

ىشكى ىستەر ءمينيسترى سونداي-اق قۇقىق بۇزۋدىڭ الدىن الۋعا باعىتتالعان ءبىرىڭعاي زاڭ ازىرلەۋ، تۇرمىستىق زورلىق-زومبىلىققا قارسى كۇرەس جونىندە ارنايى بولىمشە قۇرۋ ءۇشىن قابىلدانىپ جاتقان شارالار تۋرالى مالىمەت بەردى.

ۇيىمداسقان قىلمىسقا، ەسىرتكى قىلمىسىنا، ەكسترەميزمگە قارسى ءىس-قيمىل جۇمىستارىنىڭ ناتيجەسىن تانىستىردى.

كيبەرقىلمىسقا قارسى كۇرەس جۇرگىزەتىن دەربەس قىزمەت قۇرىلاتىنىن جەتكىزدى.

ونىڭ ايتۋىنشا، ورتا بۋىنعا جاتاتىن باسشىلىق قۇرامدى كەزەكتەن تىس اتتەستاتتاتسيادان وتكىزۋگە دايىندىق ءجۇرىپ جاتىر.

قاسىم-جومارت توقايەۆ ەلىمىزدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە ءبىرقاتار ناقتى تاپسىرما بەردى.

اۆتور

جانات قاپالبايەۆا