قاسىم-جومارت توقايەۆ جيىندا اۋعانستانداعى جاعدايعا ايرىقشا توقتالدى

استانا. KAZINFORM - پرەزيدەنت قاسىم-جومارت توقايەۆ الماتىدا ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەيا كەڭەسىنىڭ وتىرىسىنا قاتىسۋشىلارمەن كەزدەسۋدە اۋعانستانداعى جاعدايعا ايرىقشا توقتالدى. بۇل تۋرالى اقوردانىڭ باسپا ءسوز قىزمەتى حابارلادى.

پرەزيدەنتتىڭ پىكىرىنشە، قازىرگى كەزەڭدەگى ستراتەگيالىق مىندەتتەردىڭ ءبىرى - اۋعانستاندى ءوڭىرارالىق بايلانىستارعا بەلسەندى تارتۋ.

- قازاقستان تالىبتەر رەجيمىن تەررورلىق ۇيىمدار تىزىمىنەن الىپ تاستادى. ويتكەنى قازىرگى اۋعانستانمەن ساۋدا- ەكونوميكالىق ىنتىماقتاستىقتى دامىتۋ ماڭىزدى ءارى بۇگىنگى رەجيم ۇزاقمەرزىمدى فاكتور بولادى دەپ ويلايمىز، - دەدى مەملەكەت باسشىسى.

پرەزيدەنت بۇل ماسەلەدە ۇ ق ش ۇ-عا مۇشە ەلدەردىڭ ءوزارا كەلىسىلگەن ۇستانىمى بولۋى كەرەك ەكەنىنە نازار اۋدارىپ، الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى ايماقتىق ورتالىق قۇرۋ تۋرالى قازاقستاننىڭ باستاماسىن قولداۋعا شاقىردى.

قاسىم-جومارت توقايەۆ قازىرگى زاماننىڭ سىن- قاتەرلەرىنە قارسى ارەكەت ەتۋ جۇيەسىن جەتىلدىرۋ قاجەت ەكەنىن ەسكەرە وتىرىپ، ۇ ق ش ۇ كۇش-جىگەرىن ۇيىم جارعىسىنا سايكەس مۇشە- مەملەكەتتەر ءۇشىن بارىنشا وزەكتى ءارى ءتيىستى جۇمىس باعىتتارىنا جۇمىلدىرۋدى ۇسىندى. قازاقستان اتالعان مىندەتتەردى ۇيىمعا ءتوراعالىق ەتۋ كەزەڭىندە باسىم باعىت رەتىندە بەلگىلەدى.

اتاپ ايتقاندا، پرەزيدەنت تەرررورلىق ءقاۋىپ- قاتەرمەن كۇرەسۋ جانە ۇ ق ش ۇ-عا مۇشە ەلدەر ازاماتتارىنىڭ قاۋىپسىزدىگىن قامتاماسىز ەتۋ ءۇشىن پارمەندى شارالار قابىلداۋ قاجەت دەپ سانايدى.

ۇ ق ش ۇ ۇجىمدىق قاۋىپسىزدىك كۇشتەرى مەن قۇرالدارىنىڭ دايىندىق دەڭگەيى ءاردايىم جوعارى بولۋعا ءتيىس. مەملەكەت باسشىسى مۇنى تاعى ءبىر ماڭىزدى باسىمدىق دەپ اتادى

- ۇيىم ءتوراعاسى رەتىندە ۇ ق ش ۇ-نىڭ باسقارۋ ورگاندارىنىڭ، سونداي-اق كۇشتەرى مەن قۇرالدارى قۇرىلىمدارىنىڭ جەدەل جانە اسكەري دايىندىعىن كۇشەيتۋ ءۇشىن بىرلەسكەن ءىس-شارالاردى ۋاقتىلى جۇزەگە اسىرۋعا ايرىقشا ءمان بەرەمىز. بيىل كۇزدە قازاقستان اۋماعىندا «مىزعىماس باۋىرلاستىق-2024» جانە «جارتاس-2024» وقۋ- جاتتىعۋ جيىندارىن وتكىزۋگە بەلسەندى ازىرلەنىپ جاتىرمىز، - دەدى قاسىم-جومارت توقايەۆ.

پرەزيدەنت توتەنشە جاعدايلاردىڭ الدىن الۋ جانە ونىڭ سالدارىن جويۋ جونىندەگى ىنتىماقتاستىقتى قازاقستاننىڭ ۇ ق ش ۇ-عا ءتوراعالىعى كەزىندە باسىمدىق بەرىلەتىن باعىت رەتىندە اتاپ ءوتتى.

- وڭىرىمىزدەگى سۋ تاسقىنىنا بايلانىستى قالىپتاسقان جاعداي تابيعات اپاتىنىڭ قاۋپى قانشالىقتى زور ەكەنىن كورسەتتى. قازاقستانعا ونىڭ سالدارى وڭاي تيمەدى. وسى مۇمكىندىكتى پايدالانىپ، ەلىمىزدەگى سۋ تاسقىنى كەزىندە تىلەۋلەستىك ءبىلدىرىپ، كومەك كورسەتكەنى ءۇشىن مەملەكەتتەرىڭىزگە ريزاشىلىعىمدى بىلدىرەمىن. ءبىز بۇل قولداۋدى جوعارى باعالايمىز - دەدى پرەزيدەنت.