قاسىم- جومارت توقايەۆ ب ۇ ۇ- نىڭ ورنىقتى دامۋ ماقساتتارى جونىندەگى سامميتىنە قاتىستى

مەملەكەت باسشىسى قاسىم-جومارت توقايەۆ ماجارستان پرەزيدەنتى كاتالين نوۆاكپەن بىرگە ب ۇ ۇ- نىڭ «ورنىقتى دامۋ ماقساتتارىنا (و د م) قول جەتكىزۋ جولىنداعى پروگرەستى جەدەلدەتۋدىڭ نەگىزگى وتپەلى پروتسەستەرىنە قاتىستى اۋقىمدى ءىس-قيمىلداردى جانداندىرۋ» اتتى كوشباسشىلار ديالوگىنىڭ ءبىرىنشى سەسسياسىندا ءتوراعالىق ەتتى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسى ءوز سوزىندە بىرىككەن ۇلتتار ۇيىمىنىڭ 2030-جىلعا دەيىنگى كۇن ءتارتىبى بۇگىنگى وسكەلەڭ ۇرپاقتىڭ جارقىن بولاشاق قۇرۋىنا بەرىلگەن ءبىر عانا مۇمكىندىك ەكەنىن اتاپ ءوتتى.

گەوساياسي قاقتىعىستارعا بايلانىستى شيەلەنىسە تۇسكەن قازىرگى جاھاندىق سىن-قاتەرلەر ءبىزدىڭ ۇجىمدىق كۇش-جىگەرىمىزگە نۇقسان كەلتىرىپ وتىر. بۇل كەدەرگىلەردى ەڭسەرۋگە جەكەلەگەن مەملەكەتتىڭ شاماسى جەتپەيدى. الەمدىك قوعامداستىقتىڭ بىرلىگىنىڭ ارقاسىندا عانا ەلەۋلى جەتىستىكتەرگە قول جەتكىزە الامىز، - دەدى قاسىم-جومارت توقايەۆ.

پرەزيدەنتتىڭ ايتۋىنشا، قازاقستان ءۇشىن ورنىقتى دامۋ ماقساتتارىنا قول جەتكىزۋ - ۇلتتىق باسىمدىق.

ورنىقتى دامۋ قاعيداتتارى ءبىزدىڭ نەگىزگى ۇلتتىق ستراتەگيالارىمىز بەن باعدارلامالارىمىزدىڭ وزەگىنە اينالدى. بۇگىندە ورنىقتى بولاشاققا بەلسەندى تۇردە ينۆەستيتسيا قۇيىپ وتىرمىز. مەملەكەت بيۋدجەتىنىڭ 80 پايىزى ورنىقتى دامۋ ماقساتتارىنا ساي كەلەدى. ءبىز تەگىن ءبىلىم الۋدىڭ جانە دەنساۋلىق ساقتاۋدىڭ بارشاعا قولجەتىمدى بولۋىن قامتاماسىز ەتەمىز. جاڭا الەۋمەتتىك كودەكستە حالىقتىڭ وسال توپتارىن قورعاۋ شارالارى كۇشەيتىلدى، - دەدى مەملەكەت باسشىسى.

سەسسيا بارىسىندا ماجارستان پرەزيدەنتى كاتالين نوۆاك، حورۆاتيا پرەزيدەنتى زوران ميلانوۆيچ، قىرعىزستان پرەزيدەنتى سادىر جاپاروۆ، وار پرەزيدەنتى سيريل رامافوسا، اۋستريا پرەزيدەنتى الەكساندر ۆان دەر بەللەن، پەرۋ پرەزيدەنتى دينا بولۋارتە، گايانا پرەزيدەنتى يرفان الي، ميكرونەزيا پرەزيدەنتى ۋەسلي سيمينا، سولتۇستىك ماكەدونيا پرەزيدەنتى ستيەۆو پەنداروۆسكي، فينليانديا پرەزيدەنتى ساۋلي نيينيستە جانە باسقالار ءسوز سويلەدى.