قاسىم-جومارت توقايەۆ: ب ۇ ۇ ءالى دە امبەباپ ءارى بالاماسى جوق ۇيىم
استانا. KAZINFORM - قاسىم-جومارت توقايەۆ ب ۇ ۇ باس حاتشىسى انتونيۋ گۋتەرريشپەن تەلەفون ارقىلى سويلەستى، دەپ حابارلايدى اقوردانىڭ باسپا ءسوز قىزمەتى.
اڭگىمەلەسۋ بارىسىندا قازاقستان مەن بىرىككەن ۇلتتار ۇيىمى اراسىنداعى ىقپالداستىقتىڭ وزەكتى ماسەلەلەرى تالقىلاندى.
پرەزيدەنت الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى ايماقتىق ورتالىق قۇرۋ تۋرالى ب ۇ ۇ باس اسسامبلەياسى ءبىراۋىزدان قابىلداعان قاراردىڭ ماڭىزىن اتاپ ءوتتى. سونداي-اق ايماقتىق ورتالىقتىڭ ينستيتۋتتىق نەگىزىن جاساقتاۋ بويىنشا اتقارىلاتىن جۇمىستار تالقىلاندى.
قاسىم-جومارت توقايەۆ بيىل قۇرىلعانىنا 80 جىل تولعان ب ۇ ۇ- نىڭ ءالى دە امبەباپ ءارى بالاماسى جوق ۇيىم سانالاتىنىن جەتكىزدى. سونىمەن قاتار مەملەكەتتەردىڭ بارلىعى قۇرىلىم جارعىسى مەن الەم ەلدەرى مويىنداعان حالىقارالىق قۇقىق قاعيداتتارىن ساقتاۋعا ءتيىس دەپ سانايدى.
باس حاتشى قازاقستاننىڭ بىتىمگەرشىلىك كۇش-جىگەرىنە، جاھاندىق قاۋىپسىزدىكتى نىعايتۋعا جانە ورنىقتى دامۋدى ىلگەرىلەتۋگە قوسقان ۇلەسىن جوعارى باعالادى.
وسىعان دەيىن ب ۇ ۇ- نىڭ باس اسسامبلەياسى ۇيىمنىڭ ايماقتىق ورتالىعىن الماتىدا اشۋ تۋرالى قارار قابىلداعانى تۋرالى جازدىق.
