قاسىم-جومارت توقايەۆ: ب ۇ ۇ - بەيبىتشىلىك پەن دامۋدىڭ بالاماسىز قۇرىلىمى
استانا. KAZINFORM - قازاقستان پرەزيدەنتى ب ۇ ۇ- نىڭ جوعارى وكىلدەرىمەن كەزدەسۋ وتكىزدى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى ب ۇ ۇ باس حاتشىسىنىڭ ورىنباسارى - ب ۇ ۇ باس حاتشىسىنىڭ سيفرلىق ماسەلەلەر جانە وزىق تەحنولوگيالار جونىندەگى ارناۋلى وكىلى امانديپ سينگح گيللمەن، ب ۇ ۇ باس حاتشىسىنىڭ ورىنباسارى - ب ۇ ۇ دامۋ باعدارلاماسى اكىمشىسىنىڭ ورىنباسارى حاوليان شۋمەن، ب ۇ ۇ باس حاتشىسىنىڭ اۋعانستان بويىنشا ارنايى وكىلى جانە اۋعانستانعا كومەكتەسۋ جونىندەگى ب ۇ ۇ ميسسياسىنىڭ باسشىسى روزا وتىنبايەۆامەن، ب ۇ ۇ باس حاتشىسىنىڭ جاستار ءىسى جونىندەگى كومەكشىسى فەليپە پاۋلەرمەن كەزدەستى.
قاسىم-جومارت توقايەۆتىڭ ايتۋىنشا، استانا حالىقارالىق فورۋمىنا ب ۇ ۇ- نىڭ بەدەلدى وكىلدەرىنىڭ قاتىسۋى سان قىرلى ءارى سىندارلى ديالوگتىڭ بارشاعا ورتاق ەكەنىن كورسەتەدى.
قازاقستان پرەزيدەنتى گەوساياسي تۇراقسىزدىق بەلەڭ العان كەزەڭدە ب ۇ ۇ ءوزىنىڭ امبەباپ ءارى بالاماسىز سيپاتىن ساقتاپ، بەيبىتشىلىك، قاۋىپسىزدىك جانە دامۋدى قامتاماسىز ەتۋ ىسىندەگى بىرەگەي ۇيىم رەتىندە قالا بەرەتىنىنە سەنىم ءبىلدىردى.
بۇعان دەيىن حابارلانعانداي، مەملەكەت باسشىسى ب ۇ ۇ ازىق- تۇلىك جانە اۋىل شارۋاشىلىعى ۇيىمىنىڭ (FAO) باس ديرەكتورى سيۋي دۋنيۋيمەن كەزدەستى.
