قاسىم-جومارت توقايەۆ اقوردادا تو لامدى قارسى الدى
استانا. KAZINFORM - مەملەكەت باسشىسى قاسىم-جومارت توقايەۆ اقوردادا قازاقستانعا مەملەكەتتىك ساپارمەن كەلگەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لامدى قارسى الدى.
الدىمەن قاسىم-جومارت توقايەۆ پەن تو لام ءبىر-بىرىنە رەسمي دەلەگاتسيا مۇشەلەرىن تانىستىردى. وسىدان كەيىن مارتەبەلى مەيماننىڭ ساپارىنا وراي سالتاناتتى راسىمدەر زالىندا ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى. پرەزيدەنت وركەسترى ەكى ەلدىڭ مەملەكەتتىك ءانۇرانىن ورىندادى.
ءانۇرانداردى تىڭداپ بولعاننان كەيىن قاسىم-جومارت توقايەۆ پەن تو لام كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى. ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەيمان مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى. قۇرمەتتى قاراۋىل باستىعىمەن قوشتاستى.
قازىرگى ۋاقىتتا اقوردادا جوعارى دەڭگەيدەگى كەلىسسوز ءجۇرىپ جاتىر.
ايتا كەتەيك، جوعارى دەڭگەيدەگى كەلىسسوزدەر بارىسىندا ساۋدا-ەكونوميكالىق، ينۆەستيتسيالىق جانە گۋمانيتارلىق سالالارداعى قازاق-ۆەتنام ىنتىماقتاستىعىن دامىتۋ پەرسپەكتيۆاسى تالقىلانادى.
ال 7-مامىر كۇنى ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى جەڭىستىڭ 80 جىلدىعىنا وراي استانادا وتەتىن اسكەري پارادتى تاماشالايدى.
بۇعان دەيىن ۆەتنام پرەمەر-ءمينيسترىنىڭ ورىنباسارى، سىرتقى ىستەر ءمينيسترى بۋي تحان شون Kazinform اگەنتتىگىنە ەكسكليۋزيۆ سۇحبات بەرىپ، قازاقستان- ۆەتنام قارىم-قاتىناسىنىڭ جاي-كۇيى جايلى ەگجەي-تەگجەيلى ايتىپ بەرگەن ەدى.
سونداي-اق، كەيىنگى 30 جىلدان استام ۋاقىتتا ەكى ەل بايلانىسى قالاي نىعايدى؟ Kazinform اناليتيكالىق شولۋشىسى وسى تاقىرىپتى تالداپ كورگەن بولاتىن.
