قاسىم-جومارت توقايەۆ اقوردادا ناتاشا پيرتس-مۋساردى قارسى الدى
استانا. KAZINFORM - مەملەكەت باسشىسى قاسىم-جومارت توقايەۆ اقوردادا قازاقستانعا رەسمي ساپارمەن كەلگەن سلوۆەنيا پرەزيدەنتى ناتاشا پيرتس-مۋساردى قارسى الدى.
الدىمەن قاسىم-جومارت توقايەۆ پەن ناتاشا پيرتس-مۋسار ءبىر- بىرىنە رەسمي دەلەگاتسيا مۇشەلەرىن تانىستىردى. وسىدان كەيىن مارتەبەلى مەيماننىڭ ساپارىنا وراي سالتاناتتى راسىمدەر زالىندا ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى. پرەزيدەنت وركەسترى ەكى ەلدىڭ مەملەكەتتىك ءانۇرانىن ورىندادى.
ءانۇرانداردى تىڭداپ بولعاننان كەيىن قاسىم-جومارت توقايەۆ پەن ناتاشا پيرتس-مۋسار كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى. ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەيمان مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى. قۇرمەتتى قاراۋىل باستىعىمەن قوشتاستى.
قازىرگى ۋاقىتتا اقوردادا جوعارى دەڭگەيدەگى كەلىسسوز ءجۇرىپ جاتىر.
بۇعان دەيىن اقوردا كەلىسسوز بارىسىندا ساۋدا-ەكونوميكالىق، ينۆەستيتسيالىق، كولىك جانە مادەني- گۋمانيتارلىق سالالارداعى ءوزارا ىنتىماقتاستىقتىڭ نەگىزگى ماسەلەلەرىن تالقىلاۋ جوسپارلانىپ وتىرعانىن حابارلاعان ەدى.
ەكى ەل اراسىنداعى كەلىسسوز بارىسىندا ىسكەرلىك بايلانىستى دامىتۋعا ايرىقشا نازار اۋدارىلىپ، قازاقستان- سلوۆەنيا بيزنەس- فورۋمى وتەدى. سلوۆەنيا ەكوجۇيەلەردى قورعاۋ جانە ورنىقتى دامۋ باستامالارىن بەلسەندى تۇردە ىلگەرىلەتىپ كەلەدى.
بۇل ساپار ەكىجاقتى قارىم-قاتىناستى ارتتىرۋعا، سونىڭ ىشىندە ەكولوگيا، ەكونوميكا جانە گۋمانيتارلىق باستامالاردى نىعايتۋعا تىڭ مۇمكىندىك بەرەدى.
