قاسىم-جومارت توقايەۆ اقوردادا دجوردجا مەلونيدى قارسى الدى

استانا. KAZINFORM - مەملەكەت باسشىسى قاسىم-جومارت توقايەۆ اقوردادا قازاقستانعا رەسمي ساپارمەن كەلگەن دجوردجا مەلونيدى قارسى الدى.

الدىمەن قاسىم-جومارت توقايەۆ پەن دجوردجا مەلوني ءبىر- بىرىنە رەسمي دەلەگاتسيا مۇشەلەرىن تانىستىردى. وسىدان كەيىن مارتەبەلى مەيماننىڭ ساپارىنا وراي سالتاناتتى راسىمدەر زالىندا ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى. پرەزيدەنت وركەسترى ەكى ەلدىڭ مەملەكەتتىك ءان ۇرانىن ورىندادى.

ءانۇرانداردى تىڭداپ بولعاننان كەيىن قاسىم-جومارت توقايەۆ پەن دجوردجا مەلوني كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.

ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەيمان مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى. قۇرمەتتى قاراۋىل باستىعىمەن قوشتاستى.

قازىرگى ۋاقىتتا جوعارى دەڭگەيدەگى كەلىسسوز ءجۇرىپ جاتىر.

ايتا كەتەيىك، كەشە پرەزيدەنت قاسىم-جومارت توقايەۆ قازاقستانعا رەسمي ساپارمەن كەلگەن يتاليا پرەمەر- ءمينيسترى دجوردجا مەلونيدى ەلوردا اۋەجايىنان كۇتىپ الدى. مەملەكەت باسشىلارى اۋەجايىندا از- كەم اڭگىمەلەستى.

سونداي-اق كەشە ەلوردادا «يتاليا - قازاقستان» ىسكەرلىك فورۋمى ءوتىپ، ەكى ەلدىڭ ۇيىمدارى جالپى سوماسى 180 ميلليون ەۋرو بولاتىن 10 مەموراندۋمعا قول قويدى.

ال بۇگىن تۇستەن كەيىن مەملەكەتتەر باسشىلارىنىڭ قاتىسۋىمەن ءبىرىنشى «ورتالىق ازيا - يتاليا» ءسامميتى وتەدى.