قاسىم-جومارت توقايەۆ ا ە س بويىنشا رەفەرەندۋمدا داۋىس بەردى
استانا. KAZINFORM - مەملەكەت باسشىسى قاسىم-جومارت توقايەۆ ەلىمىزدە اتوم ەلەكتر ستانساسىن سالۋ بويىنشا رەفەرەندۋمدا داۋىس بەردى.
«بۇگىن تاريحي كۇن. حالقىمىز ا ە س قۇرىلىسى بويىنشا داۋىس بەرەدى، ماڭىزدى ماسەلە. بۇگىن حالقىمىز قانداي شەشىم قابىلداسا، مەملەكەتىمىزدىڭ تۇپكىلىكتى بايلامى سونداي بولادى»، - دەدى مەملەكەت باسشىسى داۋىس بەرگەننەن كەيىن ب ا ق وكىلدەرىنە بەرگەن سۇحباتىندا.
سونىمەن قاتار ب ا ق وكىلدەرى پرەزيدەنتتەن رەفەرەندۋمنان قانداي ناتيجە كۇتەتىندىگىن سۇراعان ەدى.
«ناتيجە وڭ بولادى دەپ ويلايمىن. شىن مانىندە دۇرىس ايتتىڭىز، بۇگىن تاعدىرشەشتى وقيعا. كەلەشەكتە وسىنداي وقيعالار نەعۇرلىم كوپ بولسا، ءبىزدىڭ حالقىمىز ءۇشىن، ەلىمىز ءۇشىن جاقسى بولادى دەپ ويلايمىن. سەبەبى، حالقىمىز وسىنداي وتە ماڭىزدى ماسەلەلەر بويىنشا داۋىس بەرەدى. سوندىقتان رەفەرەندۋمدى قولدايمىن»، - دەدى قاسىم-جومارت توقايەۆ.
سونداي-اق «ا ە س-تى كىم سالادى؟» دەگەن سۇراق تا تالقىلاندى. پرەزيدەنت بۇل ماسەلەدە ۇكىمەتكە ناقتى تالداۋ جاساپ، كەلىسسوزدەر جۇرگىزۋ كەرەكتىگىن ايتتى.
«ۇكىمەت ساراپتاما جاساپ، ءتيىستى كەلىسسوزدەر جۇرگىزۋى قاجەت. مەنىڭ جەكە پىكىرىم بويىنشا، قازاقستاندا ەڭ وزىق تەحنولوگيالاردى قولداناتىن الەمدىك دەڭگەيدەگى كومپانيالاردى بىرىكتىرەتىن حالىقارالىق كونسالتينگتىك توپ جۇمىس ىستەۋى كەرەك»، - دەدى توقايەۆ.
ەسكە سالايىق، بۇگىن قازاقستاندىقتار اتوم ەلەكتر ستانسياسىن سالۋ ماسەلەسى بويىنشا جالپى ۇلتتىق رەفەرەندۋمدا داۋىس بەرەدى.
ورتالىق رەفەرەندۋم كوميسسياسى ءتوراعاسىنىڭ ورىنباسارى كونستانتين پەتروۆ ەلدىڭ بارلىق وڭىرىندە قازاقستاندا اتوم ەلەكتر ستانسياسىن سالۋ ماسەلەسى بويىنشا جالپى ۇلتتىق رەفەرەندۋم باستالعانىن رەسمي ءمالىم ەتتى.
1-شىلدەدەگى جاعداي بويىنشا ەل كولەمىندە 12176968 ادام رەفەرەندۋمدا داۋىس بەرۋگە حاقىلى.
اۆتور
مارلان جيەمباي
