قاسىم-جومارت توقايەۆ الدىندا تۇرعان ماقساتتى اتادى

— ءبىز الداعى ۋاقىتتا دا حالىقتىڭ ءال-اۋقاتىن جاقسارتۋ ءۇشىن تاباندى ەڭبەك ەتە بەرەمىز. حالىقارالىق ىنتىماقتاستىقتى تەرەڭدەتىپ، ەلىمىزگە كەلەتىن ينۆەستيتسيا كولەمىن ۇلعايتۋىمىز قاجەت. وزدەرىڭىزگە ءمالىم، مەن مەملەكەتىمىزدىڭ باسشىسى رەتىندە حالىقارالىق جيىندارعا ءجيى قاتىسىپ، كوپتەگەن ەلدەردىڭ كوشباسشىلارىمەن، ينۆەستورلارمەن كەزدەسۋلەر وتكىزىپ ءجۇرمىن، — دەدى قاسىم-جومارت توقايەۆ.

پرەزيدەنت استانادا دا جوعارى دەڭگەيدەگى ءىس-شارالاردى وتكىزىپ، مەملەكەت باسشىلارىمەن جانە حالىقارالىق ۇيىم جەتەكشىلەرىمەن كەلىسسوزدەر جۇرگىزەتىنىن اتاپ ءوتتى.

— الدىمدا تۇرعان ماقسات — ايقىن: بۇل — قازاقستاندى ورتا دەرجاۆا رەتىندە بۇكىل دۇنيە جۇزىنە مەيلىنشە كەڭ اۋقىمدا پاش ەتۋ، تاريحىمىز بەن مادەنيەتىمىزدى حالىقارالىق قاۋىمداستىق دەڭگەيىندە دارىپتەۋ، مەملەكەتىمىزدىڭ مۇددەسىن قورعاۋ جانە ەلىمىزدىڭ الەۋەتىن جان-جاقتى ناسيحاتتاۋ. باسقا ويىم جوق. سوندىقتان مۇنىڭ ءبارىن بۇكىل حالقىمىزدىڭ ماقساتى دەپ كۇمانسىز ايتۋعا بولادى، — دەدى مەملەكەت باسشىسى.

حالىق كەڭەسىندە ەل ىنتىماعىن كۇشەيتە تۇسەتىن ءتيىمدى، الدىن الا مۇقيات زەرتتەلگەن باستامالار جۇزەگە اسىرىلادى. 

— ۋاقىت ءبىر ورىندا تۇرمايدى، بۇل — ءومىردىڭ زاڭى. سوندىقتان، زاماننىڭ تۇرپاتى دا، تالابى دا وزگەرىپ وتىرادى. وركەنيەتتى ەل بولۋ — جاھان كوشىنەن قالماي، ۇنەمى باسەكەگە قابىلەتتى بولۋ دەگەن ءسوز. ءبىز ۇلتتىق سانا-سەزىمگە سەرپىلىس بەرىپ، جۇرتىمىزدى ورتاق مۇددەگە جۇمىلدىرۋ ءۇشىن قوعامدىق ديالوگتى ودان ءارى دامىتا ءتۇسۋىمىز قاجەت. قازاقستان حالىق كەڭەسىن قۇرۋداعى باستى ماقساتىمىز دا — وسى، — دەپ اتاپ ءوتتى مەملەكەت باسشىسى.

پرەزيدەنتتىڭ ايتۋىنشا، ەل تاريحىندا العاش رەت قوعام مۇددەسى جولىندا ەڭبەك ەتىپ جۇرگەن ءتۇرلى توپتاعى ادامدار ءبىر قۇرىلىم اياسىندا بىرىكتى.

مۇنى «ءتۇرلى كوزقاراس — ءبىرتۇتاس ۇلت» تۇجىرىمداماسىنىڭ ءىس جۇزىندەگى ناقتى كورىنىسى دەپ ايتۋعا بولادى.

— قازاقستان حالىق كەڭەسىنىڭ قۇرىلۋى جالپىۇلتتىق بىرلىگىمىزدىڭ اناعۇرلىم نىعايىپ، ينستيتۋتسيونالدىق سيپاتقا يە بولعانىن كورسەتتى. وسىلايشا، قازاقستان حالىق كەڭەسىندە ەل ىنتىماعىن كۇشەيتە تۇسەتىن ءتيىمدى، الدىن الا مۇقيات زەرتتەلگەن باستامالار جۇزەگە اسىرىلادى. وسى ورايدا، قازاقستان حالىق كەڭەسىنىڭ كونستيتۋتسيالىق مارتەبەسىنە تاعى دا نازار اۋدارعىم كەلەدى. بۇل قادام وراسان زور مۇمكىندىكتەرگە جول اشادى، — دەدى ق. توقايەۆ.

بۇعان دەيىن پرەزيدەنت ءبىر جىلدا قازاقستاندا ەلدىڭ ساياسي جۇيەسى مەن مەملەكەتتىك باسقارۋىنا ەلەۋلى وزگەرىس اكەلگەن اۋقىمدى رەفورمالار جۇزەگە اسقانىن ايتقان ەدى.