قارىزدى زاڭدى تۇردە قالاي ەسەپتەن شىعارۋعا بولادى

پەتروپاۆل. KAZINFORM - قارىز - قوعامداعى وزەكتى تاقىرىپتاردىڭ ءبىرى. قارجىلىق قيىندىق كەز كەلگەن ادامدى تىعىرىققا تىرەۋى مۇمكىن. مۇنداي جاعدايدا ەڭ باستىسى - زاڭ اياسىندا دۇرىس شەشىم تابۋ. قارىزدان قۇتىلۋدىڭ جولدارى تۋرالى سولتۇستىك قازاقستان وبلىستىق ادۆوكاتتار القاسىنىڭ ادۆوكاتى ولگا گاۆريك تارقاتىپ ايتىپ بەردى.

ماماننىڭ ايتۋىنشا، وعان سوڭعى ۋاقىتتا «قارىزدى زاڭدى تۇردە قالاي جابۋعا نەمەسە ەسەپتەن شىعارۋعا بولادى؟ » دەگەن سۇراقپەن كەلەتىندەر قاراسى كوبەيگەن. وعان ناقتى جاۋاپ بەرۋ ءۇشىن الدىمەن قارىزدىڭ ءتۇرىن، ونىڭ قاشان پايدا بولعانىن، قاي ۋاقىتتا قايتارىلۋى ءتيىس ەكەنىن جانە مەرزىمىنىڭ ءوتىپ-وتپەگەنىن انىقتاپ الۋ قاجەت.

- بانكروتتىق - قارىزدان زاڭدى تۇردە قۇتىلۋدىڭ ءبىر جولى. قازاقستان زاڭىنا سايكەس، بۇل - ادامنىڭ قارىزدارىن تولەۋگە قابىلەتسىز ەكەنىن مەملەكەت رەسمي تۇردە تانيتىن ءراسىم. بانكروتتىقتان وتكەن ادامعا كرەديتورلار قىسىم جاساي المايدى، كوللەكتورلار دا مازالامايدى. ۋاقىت وتە كەلە ونىڭ نەسيە تاريحى دا قايتا قالپىنا كەلەدى، - دەيدى ولگا گاۆريك.

ادۆوكاتتىڭ ايتۋىنشا، قارىزدان قۇتىلۋدىڭ تاعى ءبىر جولى - تالاپ قويۋ مەرزىمىنىڭ ءوتۋىن كۇتۋ. قولدانىستاعى زاڭناماعا سايكەس، تالاپ قويۋ مەرزىمى - 3 جىل. الايدا بۇل سوتتا اۆتوماتتى تۇردە قولدانىلمايدى. ول ءۇشىن تالاپ قويۋ مەرزىمىنىڭ وتكەندىگىن ايتىپ، مىندەتتى تۇردە جاۋاپكەر سوتقا دەيىن نەمەسە سوت بارىسىندا ارنايى ءوتىنىش جاساۋى ءتيىس. ەگەر تالاپ قويۋ مەرزىمى ءوتىپ كەتكەن بولسا، سوت تالاپ ارىزدى قاناعاتتاندىرۋدان باس تارتادى.

- تاجىريبەدە ءجيى كەزدەسەتىن تاعى ءبىر ءتاسىل - قارىزدى اتقارۋشىلىق ءىس جۇرگىزۋ بارىسىندا ەسەپتەن شىعارۋ. كەيبىر جاعدايلاردا جەكە سوت ورىنداۋشىسى زاڭعا سايكەس اتقارۋشىلىق قۇجاتتى (ورىنداۋ پاراعىن) قارىزدى ءوندىرىپ الۋشىعا ورىنداۋسىز قايتارادى. ەگەر ءوندىرىپ الۋشى ونى قايتادان ورىنداۋعا بەرمەي، ۋاقىت وتكىزىپ السا، مىسالى، ۇمىتىپ كەتسە جانە سول ساتتەن باستاپ 3 جىل وتسە، ءسىز ءوزىڭىزدى بورىشكەرلەر تىزىمىنەن شىعارۋ ءۇشىن سوت ورىنداۋشىسىنا ءوتىنىش بەرە الاسىز. بۇل جاعدايدا قارىز مەرزىمى ءوتىپ كەتكەن بولىپ ەسەپتەلەدى، - دەيدى ولگا گاۆريك.

ناتيجەسىندە وسى ءوتىنىش نەگىزىندە سوت ورىنداۋشىسى ادىلەت ورگاندارىنا ۇسىنىس جولدايدى، كەيىن بورىشكەر تىزىلىمنەن جانە قارىز ءىس جۇزىندە ەسەپتەن شىعارىلادى.

- قورىتا ايتقاندا، قارىزدى زاڭدى تۇردە ەسەپتەن شىعارۋدىڭ ءۇش جولى بار: بارانكروتتىق ءراسىمى، تالاپ قويۋ مەرزىمىنىڭ ءوتۋى،
اتقارۋشىلىق ءىس جۇرگىزۋ مەرزىمدەرىنىڭ اياقتالۋى. الايدا ءاربىر جاعداي جەكە قاراستىرىلۋى ءتيىس. سوندىقتان ناقتى شەشىم قابىلداماس بۇرىن زاڭگەردىڭ كەڭەسىنە جۇگىنگەن دۇرىس، - دەيدى ادۆوكات.

بۇعان دەيىن وزىنە ادەيى بانكروتتىق جاريالاعاندار قانداي جاۋاپكەرشىلىككە تارتىلاتىندىعىن جازعان ەدىك.