قارۋلى كۇشتەردىڭ اسكەري قىزمەتشىسى 600 شاقىرىمدىق سۋپەرمارافوندى ەڭسەردى
استانا. KAZINFORM - استانا قالاسى اۋماقتىق قورعانىس بريگاداسىنىڭ بولىمشە كومانديرى 3-سىنىپتى سەرجانت راۋان ءابىلحانوۆ استانا - كوكشەتاۋ - استانا باعىتى بويىنشا جاڭا رەكورد ورناتىپ، كەزەكتى 600 شاقىرىمدىق سۋپەرمارافوندىق قاشىقتىقتى باعىندىردى. بۇل تۋرالى قورعانىس مينيسترلىگى ءمالىم ەتتى.
5 كۇن بۇرىن ەلوردانىڭ «كوكتال» ساياباعىنان مارافوندى باستاعان اسكەري قىزمەتشى قورعانىس مينيسترلىگىنىڭ عيماراتى الدىندا مارەگە جەتتى. مۇندا ونى سالتاناتتى جاعدايدا قارسى الدى. اسكەري وركەستر ونەر كورسەتىپ، مارافونشىمەن جانە ونىمەن كۇن سايىن بىرگە ەرىپ جۇرگەن كوماندانى باۋىرساقپەن سىيلاپ، ساپ الاڭىندا قۋانىش پەن ماقتانىش سەزىمگە تولى ەرەكشە اتموسفەرا ورنادى.
جەڭىمپازدى قورعانىس مينيسترلىگىنىڭ باسشىلىعى مەن جەكە قۇرامى، قىزمەتتەستەرى مەن تۋعان-تۋىستارى قارسى الدى. قورعانىس ءمينيسترىنىڭ ورىنباسارى گەنەرال- لەيتەنانت قانىش ابۋباكىروۆ 3-سىنىپتى سەرجانت راۋان ءابىلحانوۆتىڭ بۇل جەتىستىگى اسكەري قىزمەتشىلەردىڭ رۋحىن كوتەرىپ، تاباندىلىعى مەن ءپاتريوتيزمىنىڭ جارقىن ۇلگىسى بولعانىن اتاپ ءوتتى.
- سپورت پەن ارميا - ەگىز ۇعىم، - دەدى ول. - 3-سىنىپتى سەرجانت راۋان ءابىلحانوۆتىڭ جەڭىستەرى سپورتتى ناسيحاتتاپ، قارۋلى كۇشتەردىڭ اسكەري قىزمەتشىلەرىن جاڭا جەتىستىكتەرگە جەتەلەيدى.
مارافونشىنىڭ ءوزى بۇل رەكوردقا جەتۋ وڭاي بولماعانىن مويىندادى. دەگەنمەن، قورعانىس مينيسترلىگى باسشىلىعىنىڭ، كومانديرلەرىنىڭ، جاقىندارى مەن جەرلەستەرىنىڭ، سونداي-اق كوپتەگەن قازاقستاندىقتاردىڭ قولداۋى وعان ۇلكەن كۇش بەرگەن. اۋا رايىنىڭ كۇرت ناشارلاۋىنا قاراماستان، ول كۇنىنە 120 شاقىرىم جۇگىرىپ، وتە اۋىر قاشىقتىقتى ەڭسەرە الدى. ماقساتىنا جەتۋگە دەگەن تاباندىلىعى مەن تۇراقتى جاتتىعۋلارى 3-سىنىپتى سەرجانت راۋان ءابىلحانوۆقا قاجەتتى قارقىندى ساقتاپ، جۇگىرۋدى جالعاستىرۋعا مۇمكىندىك بەردى.
اسكەري مارافونشىنىڭ ايتۋىنشا، ءبولىم باسشىلىعى وعان دايىندىق ءۇشىن ەكى اي ۋاقىت بەرگەن. ول كۇن سايىن 40 شاقىرىمنان استام قاشىقتىقتى جۇگىرىپ وتىرعان. بۇل رەكورد قازاقستان رەسپۋبليكاسىنىڭ ۇلتتىق مەرەكەسى - رەسپۋبليكا كۇنى قارساڭىندا بۇرىنعى قازاقستاندىق ۋلترامارافون رەكوردتارىن جاڭارتتى.
9 بالانىڭ اكەسى ارميادا 20 جىلدان استام ۋاقىت قىزمەت ەتىپ كەلەدى. 2022 -جىلى ول الماتى وبلىسىنداعى «ءالي» وقۋ ورتالىعى مەن شەلەك اۋىلى اراسىنداعى 350 شاقىرىمدىق قاشىقتىقتى 48 ساعاتتا جۇگىرىپ ءوتىپ، قازاقستان رەكوردتار كىتابىنا ەنگەن بولاتىن. 42 جاستاعى راۋان ءابىلحانوۆتىڭ وتباسىندا 8 قىز بەن ءبىر ۇل تاربيەلەنۋدە. ول 15 جىلدان استام ۋاقىتتان بەرى جەڭىل اتلەتيكامەن اينالىسىپ كەلەدى جانە الماتى قالاسى مەن قارۋلى كۇشتەر ۇيىمداستىرعان مارافونداردىڭ بىرنەشە دۇركىن جەڭىمپازى.
استانالىق اسكەري 3-سىنىپتى سەرجانت راۋان ءابىلحانوۆ 600 شاقىرىمدىق ۋلترامارافونعا اتتانعانىن جازعان ەدىك.
