قارۋلى كۇشتەردىڭ اسكەري قىزمەتشىلەرى ءۇشىن ءبىرىڭعاي كيىم نىسانى ەنگىزىلەدى
استانا. KAZINFORM - اسكەري قىزمەتشىلەردىڭ بارلىق ساناتتارىنا ارنالعان جاڭا نىساندى كيىم ۇلگىلەرىن 2023-جىلعى 5- مامىردا وتكەن بۇكىلارميالىق كەڭەستە مەملەكەت باسشىسى قاسىم-جومارت توقايەۆ ماقۇلداعانىن قورعانىس مينيسترلىگى حابارلادى.
قولدانىستاعى كيىم نىساندارى مەملەكەت باسشىسىنىڭ تاپسىرماسى بويىنشا مۇددەلى مەملەكەتتىك ورگاندارمەن بىرلەسىپ قايتا وڭدەلدى.
وتكەن جىلعى 12- جەلتوقساندا قازاقستان رەسپۋبليكاسى پرەزيدەنتىنىڭ 2011-جىلعى 25- تامىزداعى «قازاقستان رەسپۋبليكاسى قارۋلى كۇشتەرىنىڭ، باسقا دا اسكەرلەرى مەن اسكەري قۇرالىمدارىنىڭ اسكەري قىزمەتشىلەرىنىڭ اسكەري كيىم نىسانى مەن ايىرىم بەلگىلەرى تۋرالى» جارلىعىنا وزگەرىستەر ەنگىزىلدى.
اسكەري قىزمەتشىلەر قاراكول جاعالى قىسقى كۋرتكانىڭ ورنىنا «الياسكا» ءتيپتى كۋرتكالار كيەتىنى حابارلانعان. جوعارى وفيتسەرلىك قۇرامنان وزگە اسكەري قىزمەتشىلەردىڭ باس كيىمدەرى كۇنقاعارسىز بولادى. ماۋسىمدىق كۇندەلىكتى پلاش كامۋفلياج ءتۇستى دالالىق كۇرتەشەگە، ال كۇندەلىكتى سۆيتەر دالالىق سۆيتەرگە اۋىستىرىلدى. اسكەري قىزمەتشى ايەلدەر ءۇشىن پيلوتكانىڭ ورنىنا كەپي قاراستىرىلعان.
«جوعارى وفيتسەرلىك قۇرامنان، قورعانىس مينيسترلىگى مەن باس شتابتىڭ قۇرىلىمدىق بولىمشەلەرىنىڭ، قارۋلى كۇشتەر باس باسقارمالارىنىڭ باستىقتارىنان، باس قولباسشىلاردان، قولباسشىلاردان جانە ولاردىڭ ورىنباسارلارىنان وزگە اسكەري قىزمەتشىلەردىڭ بارلىق ساناتتارى ءۇشىن كيتەل، شالبار، جەيدەلەر، گالستۋكتار الىنىپ تاستالدى»، - دەلىنگەن.
وفيستىك كيىم نىسانى تەك باسقارۋ ورگاندارى، جوعارى وقۋ ورىندارىنىڭ تۇراقتى قۇرامى، اسكەري ءبولىم كومانديرلەرى، ولاردىڭ ورىنباسارلارى جانە اسكەري قاتىناستار كومەنداتۋرالارى ءۇشىن كۇندەلىكتى كيىم ۇلگىسى بولىپ ايقىندالادى.
قارا ءتۇستى قونىشى ۇزىن باتەڭكەمەن قاتار تۇراقتى قۇرامعا ارنالعان قۇم ءتۇستى جازعى باتەڭكەمەن قامتاماسىز ەتۋ دە قاراستىرىلعان. بۇل نۇسقا ەلىمىزدىڭ گەوگرافيالىق ەرەكشەلىكتەرىنە، سونداي-اق ىستىق وتكىزبەيتىن جانە بۇركەمەلەۋ قاسيەتتەرىنە بايلانىستى.
جاڭا ۇلگىدەگى دالالىق كيىم-كەشەككە كوشۋ 2024-جىلدىڭ ءتورتىنشى توقسانىنا، قالعان زاتتارعا كوشۋدى ءۇش جىل ىشىندە جۇزەگە اسىرۋ جوسپارلانعان.
