قارجى ساراپشىسى تەڭگە قۇنىنىڭ السىرەۋ سەبەبىن ءتۇسىندىردى

الماتى. KAZINFORM - قارجى ساراپشىسى راسۋل رىسمامبەتوۆ كەيىنگى ۋاقىتتا تەڭگەنىڭ دوللارعا شاققانداعى قۇنىنىڭ السىرەۋىن ءتۇسىندىردى.

قازاقستان قور بيرجاسىندا 9-قازان كۇنى كۇندىزگى ساۋدا-ساتتىق قورىتىندىسى بويىنشا دوللاردىڭ ورتاشا سارالانعان باعامى 489,06 تەڭگە بولدى.

«بىزدە تاۋارلى ەكونوميكا. مۇناي نارىعىندا وزگەرىستەر نەمەسە بيۋدجەتتە تەڭگەرىمسىزدىك بايقالعان كەزدە، ول ۇلتتىق ۆاليۋتاعا اسەر ەتەدى. جالپى، مۇنىڭ ۇتىمدى تۇستارى شامالى. مەنىڭ بەس جىل بۇرىن جاساعان بولجامىما ساي كەلىپ تۇر. ياعني، ۇزاق مەرزىمدى پەرسپەكتيۆادا ءبىز ەكونوميكامىزدى ءارتاراپتاندىرۋعا مۇمكىندىك العانشا تەڭگە السىرەي بەرەدى. بىزدە بەلگىلى ءبىر قادامدار جاسالىپ جاتىر، ءبىراق ناقتى تۇراقتىلىققا جەتۋ ءۇشىن ءالى دە ۋاقىت قاجەت. تاۋەلدىلىگىمىزدى ازايتۋ ءۇشىن مۇنايعا بايلانىسى جوق ءتۇرلى شيكىزات سالالارىن دامىتۋ كەرەك»، - دەيدى سپيكەر.

ساراپشىنىڭ ايتۋىنشا، الداعى ۋاقىتتا دا تەڭگە السىرەيدى.

«ودان ءارى قۇبىلۋىنا كەلەتىن بولساق، الداعى ءۇش جىلدا تەڭگەنىڭ السىرەۋى ابدەن مۇمكىن. قىسقا مەرزىمدە ول ازداپ نىعايىپ، كەيىن قايتا قۇلدىرايدى. نارىقتىق اۋىتقۋلار جالعاساتىن بولادى. دەگەنمەن، تەڭگەنىڭ 450-470 دەڭگەيىنە دەيىن كۇرت نىعايۋىن كۇتۋدىڭ قاجەتى جوق. ا ق ش- تىڭ فەدەرالدىق رەزەرۆتىك جۇيەسى پايىزدىق مولشەرلەمەلەردى ءسال تومەندەتسە، تەڭگە تۇراقتانادى، تومەن ماندەردە بولسا دا، تۇراقتانۋى مۇمكىن»، - دەدى راسۋل رىسمامبەتوۆ.

بۇعان قوسا، ول سولتۇستىك جارتى شارداعى جىلىتۋ ماۋسىمىنىڭ باستالۋى مۇناي باعاسىنىڭ وسۋىنە اكەلۋى مۇمكىن ەكەنىن ايتتى.

«ءبىراق كەز كەلگەن جاعدايدا تەڭگەنىڭ ناقتى باعامى 480-490 تەڭگە شەگىندە بولادى جانە ونىڭ ودان ءارى السىرەۋى مۇمكىن»، - دەدى ول.

ايتا كەتەيك، قازاقستان قور بيرجاسىندا ا ق ش اقشاسى ءۇشىنشى كۇن قاتارىنان قىمباتتاپ جاتىر.

اۆتور

الما مۇقانوۆا