قارجاۋباي سارتقوجا ۇلى ۇلتتىق پانتەونعا جەرلەندى

استانا. قازاقپارات - استانادا 29-شىلدە كۇنى اكادەميك، بەلگىلى تۇركىتانۋشى قارجاۋباي سارتقوجا ۇلىن جەرلەۋ ءراسىمى ءوتتى. قارالى جيىنعا عالىمنىڭ ەت-جاقىندارى، تاريحشىلار، قوعام قايراتكەرلەرى مەن ۇكىمەت مۇشەلەرى قاتىستى.

كورنەكتى تاريحشى، ەتنوگراف عالىم، شىعىستانۋشى، «قۇرمەت» وردەنىنىڭ يەگەرى، اكادەميك قارجاۋباي سارتقوجا ۇلىنىڭ دۇنيەدەن وتۋىنە بايلانىستى ونىڭ وتباسى مەن جاقىن تۋىستارىنا پرەزيدەنت قاسىم-جومارت توقايەۆ تا كوڭىل ايتۋ جەدەل حاتىن جولداعان.

- قارجاۋباي سارتقوجا ۇلى بار سانالى عۇمىرىن تۇركى دۇنيەسىنىڭ تاريحىن تۇگەندەۋگە، ۇلت رۋحانياتىنىڭ كوكجيەگىن كەڭەيتۋگە ارناعان زەردەلى عالىم بولدى. عىلىمعا شىن بەرىلگەن قاراپايىم بولمىسىمەن بىتىكتاس بىلگىرى اتاندى. ىرگەلى ەڭبەكتەر جازىپ، ۇلاعاتتى ۇرپاق تاربيەلەدى. قارىمدى قالامگەر رەتىندە وقىرمان قاۋىمعا ويلى شىعارمالار ۇسىندى. سوڭىنا رۋحاني مول مۇرا قالدىرعان قارجاۋباي سارتقوجا ۇلىنىڭ جارقىن بەينەسى حالقىمىزدىڭ جۇرەگىندە ماڭگى ساقتالادى. مارقۇمنىڭ يمانى سالامات، جانى ءجانناتتا بولسىن، - دەپ جازىلعان جەدەلحاتتا.

بەلگىلى تۇركولوگ قارجاۋباي سارتقوجا ۇلى 78 جاسقا قاراعان شاعىندا دۇنيەدەن وزدى. مارقۇم ۇلتتىق پانتەونعا جەرلەندى.

ۇلتتىق پانتەون - اسا كورنەكتى مەملەكەت، عىلىم، مادەنيەت قايراتكەرلەرىن، سونداي- اق قازاقستاننىڭ دامۋىنا ۇلەس قوسقان ادامداردى ماڭگى ەستە ساقتاۋ ماقساتىندا سالىنعان، مەموريالدىق ماڭىزى بار ساۋلەت وبەكتىسى بولىپ تابىلاتىن، قايتىس بولعان (قازا تاپقان) ادامداردى جەرلەۋگە ارنالعان ورىن. پانتەون اقمولا وبلىسى، سەلينوگراد اۋدانى، قابانباي باتىر اۋىلى ماڭىندا، استانا قالاسىنان وڭتۇستىككە قاراي 17 شاقىرىم جەردە ورنالاسقان.

قارجاۋباي سارتقوجا ۇلى- 1947-جىلى 21-ناۋرىزدا موڭعوليانىڭ بايان-ولگەي ولكەسىندە دۇنيەگە كەلگەن. 1973-جىلى موڭعوليا مەملەكەتتىك ۋنيۆەرسيتەتىن بىتىرگەن. 1985-1988 -جىلدارى لەنينگرادتاعى شىعىس تانۋ ينستيتۋتىنىڭ اسپيرانتۋراسىندا وقىعان. 1990 - 1993 جىلدارى موڭعوليا رەسپۋبليكاسىنىڭ پارلامەنتىنىڭ مۇشەسى بولىپ سايلانعان.

1993-1996 ج ج. تۇركى-قازاق عىلىمي ورتالىعىنىڭ اعا عىلىمي قىزمەتكەرى، ديرەكتورى.

1996-1999 ج ج. بايان-ولگەي ايماقتىق ءماسليحات ءتوراعاسى.

2001 - 1999 ج ج. موڭعوليانىڭ بايان-ولگەي ايماعىنداعى تۇركى-قازاق عىلىمي ورتالىعىنىڭ ديرەكتورى.

2001 -جىلدان استاناداعى ەۋرازيا ۇلتتىق ۋنيۆەرسيتەتىنىڭ ەپيگرافيكا جانە ەتنوگرافيا لابوراتورياسىنىڭ مەڭگەرۋشىسى.

2010 -جىلدان باستاپ ل. ن. گۋميليەۆ اتىنداعى ە ۇ ۋ تۇركى تانۋ جانە التاي تانۋ عىلىمي-زەرتتەۋ ورتالىعىنىڭ ديرەكتورى بولىپ جۇمىس ىستەگەن.

«قوش بول، اپا!»، «قىراننىڭ قازاسى»، «سايگۇلىكتەر» اتتى كوركەم پروزالىق كىتاپتاردىڭ، 250-دەن استام عىلىمي ماقالالاردىڭ اۆتورى. 30-عا جۋىق عىلىمي ماقالالارى ورىس، فرانسۋز، اعىلشىن، موڭعول، قازاق، قىتاي تىلدەرىندە عىلىمي باسىلىمداردا جاريالاندى.

ءوزىنىڭ سانالى عۇمىرىن تۇركولوگيا عىلىمىنا ارناپ، بايىرعى تۇرىك ءتىلى، ونىڭ ماتىندەرىن اۋدارىپ، ءتىلدىڭ تاريحي تولىق تۇسىنىكتەمەلەرىن جاسادى.