قارۋدى قانداي ادام ساتىپ الا الادى، ونى ۇيدە ساقتاۋ ءتارتىبى قانداي

وسكەمەن. KAZINFORM - شىعىس قازاقستان وبلىسىنىڭ پوليتسەيلەرى قارۋ ساتىپ العىسى كەلگەن ادامداردىڭ نەنى ءبىلۋى كەرەكتىگىن ءتۇسىندىردى. زاڭعا سايكەس 21 جاسقا تولعان ازامات قانا ازاماتتىق قارۋ ساتىپ الۋعا قۇقىلى. ءبىراق ول ءۇشىن رۇقسات قاعازدارىن راسىمدەۋ كەرەك.

- ەڭ اۋەلى تۇرعىلىقتى جەرىڭىز بويىنشا ىشكى ىستەر ورگاندارىنا eGov پورتالى ارقىلى ەلەكتروندىق ءوتىنىش بەرەسىز. سىزگە اڭشى كۋالىگى، قارۋ يەلەنۋگە قارسى مەديتسينالىق كورسەتىلىمدەردىڭ جوقتىعىن راستايتىن انىقتاما جانە قارۋدى پايدالانا ءبىلۋ ەرەجەلەرى بويىنشا تەكسەرۋدەن وتكەنى تۋرالى انىقتاما قاجەت، - دەپ حابارلادى شقو پوليتسيا دەپارتامەنتىنەن.

رۇقسات الىنعاننان كەيىن قارۋ بەلگىلەنگەن تالاپتارعا سايكەس ساقتالۋى ءتيىس.

اتاپ ايتقاندا:

• قابىرعاسىنىڭ قالىڭدىعى كەمىندە 3 م م بولاتىن بەرىك قارۋ سەيفىنە؛

• سەيف ەدەنگە نەمەسە قابىرعاعا مىقتاپ بەكىتىلۋى ءتيىس؛

• سەيفتىڭ ەسىگى ىشكى قۇلىپپەن جابدىقتالۋى قاجەت. قالالاردا قارۋ ساقتايتىن ورىننىڭ دابىل جۇيەسى بولۋى ءتيىس. دابىل سيگنالى يەسىنە، وتباسى مۇشەلەرىنە نەمەسە كۇزەت ۇيىمىنا بەرىلە الادى. قانداي كۇزەت جۇيەسىن ورناتۋ كەرەكتىگىن قارۋ يەسى ءوزى شەشەدى.

- قارۋعا قاتىستى مەملەكەتتىك قىزمەت كورسەتۋ جانە ءوتىنىشتى قاراۋ مەرزىمى تىركەلگەن كۇننەن باستاپ 15 جۇمىس كۇنىنە دەيىن سوزىلادى. قارۋ ساقتاۋ ەرەجەلەرىن بۇزباۋ - قارۋ يەسىنىڭ مىندەتى عانا ەمەس، جەكە جانە قوعامدىق قاۋىپسىزدىكتىڭ كەپىلى، - دەلىنگەن اقپاراتتا.