قاراشا ايىندا كۇن سايىن 400 گە جۋىق بالا ەمدەلۋگە جاتقىزىلعان

ق ر دەنساۋلىق ساقتاۋ مينيسترلىگى بيىلعى قاراشا ايىندا ەلىمىزدە بولعان ەپيدەميولوگيالىق جاعدايعا تۇسىنىك بەردى، دەپ حابارلايدى Kazinform.

«جەرگىلىكتى اتقارۋشى ورگانداردىڭ مالىمەتىنە قاراعاندا، بالالارعا ارنالعان 2911 ورىن بار، ونىڭ ىشىندە 139 ى رەانيماتسيالىق. ەلدەگى اۋرۋحانا توسەك-ورىندارىنىڭ شامامەن 52 پايىزىندا بالالار ەمدەلىپ جاتىر. اۋرۋ تەز تاراعان وڭىرلەردە رەزەرۆتىك ورىندار قامتاماسىز ەتىلگەن. بيىل 10- قاراشاداعى جاعداي بويىنشا 2079 بالا ستاتسيونارلى تارتىپتە ەمدەلىپ جاتىر»- ، - دەلىنگەن مينيسترلىكتىڭ Kazinform اگەنتتىنە بەرگەن جاۋابىندا.

سونىمەن قاتار ەلىمىزدە كۇن سايىن 300 دەن استام بالا اۋرۋحانادان ەمدەلىپ شىقسا، ال 400 گە جۋىق بالا ەمدەلۋگە بارادى.

جاقىندا دەنساۋلىق ساقتاۋ ءمينيسترى اجار عينيات قىزىلشا ورشىگەن وڭىرلەردى اتادى.

رەسپۋبليكادا قىزىلشانىڭ 17 مىڭنان استام جاعدايى تىركەلگەن، 82 پايىزدان استامى بالالارعا تيەسىلى. ونىڭ ىشىندە، 83 پايىزى - ەكپە الماعان بالالار.