قاراعاندىنىڭ كوركى - كەنشىلەر مادەنيەت سارايى
استانا. KAZINFORM - قاراعاندى كەنشىلەر مادەنيەت سارايى - قالانىڭ كورنەكتى جەرى سانالاتىن ساۋلەت تۋىندىسى. 72 جىل ىشىندە عيمارات كوپتەگەن وزگەرىستەرگە ۇشىرادى. بۇل تۋرالى ارحيۆ سۋرەتتەرىنەن بىلۋگە بولادى.
قاراعاندىداعى مادەنيەت سارايىنىڭ قۇرىلىسى 1940-جىلى باستالدى. جوبانىڭ اۆتورلارى ساۋلەتشىلەر يوسيف برەننەر مەن ياكوۆ يانوش بولدى. قۇرىلىس ءبىر جىلدان ءسال استام ۋاقىتقا سوزىلدى، ءبىراق ۇلى وتان سوعىسىنىڭ باستالۋىنا بايلانىستى توقتاپ قالدى.
ساراي قۇرىلىسى تەك 1948-1949-جىلدارى عانا قايتا جالعاستى. 1950-جىلى سارايدىڭ ءبىرىنشى بولىگىنىڭ قۇرىلىسى اياقتالدى. 1951-جىلى مادەني ورتالىقتىڭ ورتالىق بولىكتەرى پايدالانۋعا بەرىلىپ، 1952-جىلى قالالىق مادەنيەت ءۇيى رەتىندە اشىلدى.
اسىرەسە ساراي الدىنداعى التى ءمۇسىن قالا تۇرعىندارى مەن قوناقتارىنىڭ نازارىن اۋداراتىن. ولار قاراپايىم كەڭەس ازاماتتارى: كەنشى، قۇرىلىسشى، قوزىلى شوپان، كولحوزشى، دومبىرا ۇستاعان اقىن جانە سارباز. ەسكيزدەردىڭ اۆتورى ماسكەۋلىك ءمۇسىنشى ەۆگەني ۆۋچەتيچ بولدى.
مادەنيەت سارايىنىڭ ىشكى كورىنىسىنە كەلسەك، كونتسەرت زالىنداعى ۇلكەن توبە ساۋلەتشىلەر مەن سۋرەتشىلەردى ەرەكشە تاڭداي قاقتىرادى. توبەسى 17 عاسىرعا جاتاتىن باتىستىق كلاسسيكا ادىسىمەن بويالعان. كەسكىندەمەنىڭ تاقىرىبى عانا كەڭەستىك داۋىرگە سايكەس كەلدى: دەمونستراتسيا، تۋلار، كەڭەس جۇمىسشىلارى، پيونەرلەر. كارتينانى ماسكەۋ سۋرەتشىلەر قاۋىمداستىعىنىڭ مۇشەلەرى تۋتيەۆول مەن اكسەنوۆ جاسادى.
70-جىلداردى كەنشىلەر مادەنيەت سارايىنىڭ گۇلدەنگەن شاعى دەۋگە بولادى. ول كەزدە مادەنيەت سارايىندا 48 ونەر ۇجىمى بولدى.
ال 90-جىلدار مادەنيەت سارايى ءۇشىن ەڭ قيىن جىلدار بولدى.
1994-جىلى سارايدا بار بولعانى 11 فولكلورلىق ۇجىم جۇمىس ىستەدى. 1996-جىلى قاراعاندى وبلىسىنىڭ اكىمى پەتر نەفەدوۆ مادەنيەت سارايىن جەكەشەلەندىرۋگە رۇقسات بەردى.
1997-جىلى مادەنيەت سارايىنىڭ عيماراتى ساتىلىمعا شىعارىلىپ، مادەنيەت وشاعىن «ۆاليۋت- ترانزيت» سەرىكتەستىگىنىڭ ەنشىلەس كاسىپورنى «ارگۋس» ج ش س ساتىپ الدى.
2000-جىلداردىڭ باسىندا عيمارات مۋنيتسيپالدىق مەنشىككە قايتارىلدى. 2007-جىلدىڭ 26-اقپانىندا اۋدانارالىق ەكونوميكالىق سوت مادەنيەت ءۇيىن جەكەشەلەندىرۋدى زاڭسىز دەپ تانىدى.
2007-جىلعى 25-ساۋىردە ەكونوميكالىق سوت كەنشىلەر مادەنيەت سارايىنىڭ عيماراتىن مەملەكەت مەنشىگىنە قايتارۋ تۋرالى شەشىم قابىلدادى.
ءبىراق وسى 10 جىل ىشىندە مادەنيەت سارايىنىڭ ىشكى ينتەرەرى تونالىپ، كورىنىسى ايۋاندىقپەن وزگەردى. جەكە مەنشىك يەسى وندا كەڭسە عيماراتتارىن جاساماق بولىپ، بارەلەفتەر مەن كارنيزدەر، ەمەننەن جاسالعان ورىندىقتار الىنىپ، پەردەلەر اۋىستىرىلدى.
مۋنيتسيپالدى مەنشىككە قايتارىلعاننان كەيىن نىسان اكىمشىلىگى مادەني مۇرانى قالپىنا كەلتىرۋمەن اينالىسادى.
عيماراتتىڭ سىرتى وزگەرىسسىز قالدى. تەك ول بىرنەشە رەت بويالدى: كوك، سارى جانە اقشىل تۇسكە. تەك سوڭعى جىلدارى عانا ساراي بۇرىنعى سۇر تۇسىنە قايتارىلدى.
قازىر كەنشىلەر مادەنيەت سارايىندا 26 شىعارماشىلىق توپ جۇمىس ىستەپ، 700 دەن استام ادام ەڭبەك ەتىپ جاتىر.
