قاراعاندىلىق عالىمدار تۋبەركۋلەزدى ەمدەيتىن «نانوتاسىمالداۋشى» جاساپ جاتىر

استانا. KAZINFORM - قاراعاندىلىق عالىمدار تۋبەركۋلەز دەرتىن ءتيىمدى ەمدەيتىن «نانوتاسىمالداۋشى» جاساپ جاتىر، دەپ حابارلايدى 24KZ.

بۇل، قاراپايىم تىلمەن ايتقاندا، وكپەگە تىكەلەي ءدارى جەتكىزەتىن ەلەمەنت. بۇرىن قۇرت اۋرۋىنا شالدىققاندار كەمى 2 ساعات سايىن ۋىس-ۋىس ءدارى ىشۋگە ءماجبۇر بولعان. سونىڭ كەسىرىنەن اعزانىڭ وزگە مۇشەلەرىنە زور زاقىم تيەتىن. جاڭا جوبا قولداۋ تاپسا، الەمدىك دەڭگەيدەگى تىڭ جاڭالىق بولۋى مۇمكىن. قازىر وعان گونكونگتىق عالىمدار قىزىعۋشىلىق تانىتىپ وتىر.

تۋبەركۋلەز تۋدىراتىن كوح تاياقشالارىنا قارسى ءداستۇرلى ءدارى-دارمەكتىڭ دارمەنى از. فيلوسوفيا عىلىمىنىڭ دوكتورى الدانا عاليەۆا وسىلاي دەپ ەسەپتەيدى. سەبەبى 2 ساعات سايىن قابىلداناتىن ەمگە ادام اعزاسى ۇيرەنىپ الادى. سالدارىنان زياندى ۆيرۋستى تۇبەگەيلى جويۋ ءۇشىن ناۋقاس جىلدار بويى وقشاۋلانىپ ەم قابىلداۋعا ءماجبۇر بولادى. بۇل ونىڭ پسيحولوگيالىق، مورالدىق جاعدايىنا كەرى اسەر ەتەدى. ال عالىمنىڭ جوباسى ونداعان ءدارىنى تەك ءبىر كاپسۋلامەن الماستىرۋعا مۇمكىندىك بەرەدى.

الدانا عاليەۆا، فيلوسوفيا عىلىمىنىڭ دوكتورى، جەتەكشى عىلىمي قىزمەتكەر:

- ەگەر دە ءبىز الىنعان نانوبولشەكتەرگە وسى دارىلىك زاتتاردى ەنگىزەتىن بولساق، وندا دارىلىك زات پوليمەرلىك زاتتان باياۋ بوساپ شىعادى جانە سول ارقىلى اۋرۋعا شالدىققان ادام تاۋلىگىنە ءبىر نەمەسە ەكى رەت قانا ءدارى ءىشۋى مۇمكىن. سونىمەن قاتار ۋىتتىلىعىن ازايتۋى مۇمكىن دارىلىك زاتتىڭ.

عالىمىنىڭ بۇل جاڭالىعىنا گونكونگتىق عالىمدار قىزىعۋشىلىق تانىتقان. وسى باعىتتا زەرتتەۋلەر جۇرگىزىپ جاتقان چەنگ سيۋ ين پوليساحاريدتەر مەن ولاردىڭ كەشەندەرىن پايدالانىپ، «نانوتاسىمالداۋشىلاردى» ازىرلەۋ جوباسىن جالعاستىرماق.

چەنگ سيۋ ين، فيلوسوفيا عىلىمىنىڭ دوكتورى:

- وسى باعىتتا ۇزاق جىلدار بويى جۇمىس ىستەگەندىكتەن، عىلىمي ىزدەنىستى قازاقستاندا جالعاستىرۋ قىزىق بولدى. قازىر ءوز جوباممەن قازاقستاندىق عالىمداردىڭ جوباسىن سالىستىرىپ، تاجىريبە بولىسسەك دەيمىن. مىسالى، ءوز باسىم دەندريمەرلەردى زەرتتەيمىن. ول ءدارى تاسىمالداۋعا جاقسى مۇمكىندىك اشار ەدى.

اتالعان زەرتتەۋ جۇمىستارى بوكەتوۆ اتىنداعى ۋنيۆەرسيتەتتىڭ حيميا فاكۋلتەتىندە جۇزەگە اسىپ جاتىر. ءبىراق ارنايى لابوراتوريانىڭ جوقتىعىنان تىشقاندار مەن جان-جانۋارلارعا ەكسپەريمەنت جۇرگىزۋگە مۇمكىندىك جوق. سول سەبەپتى عالىمدار جوبانى تەرەڭ زەرتتەۋ ءۇشىن قولداۋ بولسا دەيدى.