قاراعاندىدا ەكى پوليتسيا كۋاگەردى ازاپتاپ، كىنانى موينىنا العىزباق بولعانى ءۇشىن سوتتالدى
قاراعاندى. KAZINFORM - قاراعاندى وبلىسى پروكۋراتۋراسىنىڭ سوتقا دەيىنگى تەرگەپ-تەكسەرۋ باسقارماسى پوليتسيا قىزمەتكەرلەرىنىڭ كۋاگەردى ازاپتاۋىنا قاتىستى قىلمىستىق ءىستى تەرگەدى. بۇل تۋرالى باس پروكۋراتۋرانىڭ باسپا ءسوز ورتالىعى حابارلادى.
ازاماتتىڭ باسقا تۇلعانىڭ دەنساۋلىعىنا ورتاشا زيان كەلتىرگەنى ءۇشىن جاۋاپ الۋ ماقساتىندا پوليتسياعا شاقىرىلعانى انىقتالدى. قىزمەتتىك بولمەدە ەكى جەدەل قىزمەتكەر وعان پسيحولوگيالىق قىسىم كورسەتىپ، كىناسىن مويىنداۋ ءۇشىن دەنە جاراقاتىن سالعان.
- قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى كريمينالدىق پوليتسيا ءبولىمىنىڭ اعا جەدەل قىزمەتكەرلەرىن قازاقستان رەسپۋبليكاسى قىلمىستىق كودەكسىنىڭ 146-بابى 2-بولىگىنىڭ 1-تارماعىنا سايكەس كىنالى دەپ تانىپ، جازالارىن قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەۋمەن 3 جىلعا باس بوستاندىقتارىنان ايىردى، - دەلىنگەن حابارلادا.
سوتتالعاندار «پوليتسيا كاپيتانى» ارنايى اتاقتارىنان ايىرىلدى. ولارعا جابىرلەنۋشلەردىڭ وتەماقى قورىنا ايىپپۇل تولەۋ جازاسى دا تاعايىندالدى.
قاراعاندى وبلىستىق سوتىنىڭ قىلمىستىق ىستەر جونىندەگى سوت القاسى ۇكىمدى وزگەرىسسىز، اپەللياتسيالىق شاعىمداردى قاناعاتتاندىرۋسىز قالدىردى.
ەسكە سالا كەتەيىك، بۇعان دەيىن ولجاس بەكتەنوۆ پوليتسيا كەز كەلگەن، ءتىپتى كىشىگىرىم قۇقىق بۇزۋشىلىقتارعا بىردەن دەن قويۋى ءتيىس دەگەنىن جازعان بولاتىنبىز.
