قاراعاندىدا الدەبىرەۋ وقۋشىلارعا وق جاۋدىرامىن دەپ قورقىتىپ جاتىر
قاراعاندى. KAZINFORM - قاراعاندىدا بەلگىسىز بىرەۋ مەكتەپتەردە لاڭكەستىك ارەكەت دايىندالىپ جاتقانىن حابارلادى. بارلىق وقۋ ورىندارىندا كۇزەت كۇشەيتىلدى.
تاڭەرتەڭنەن الەۋمەتتىك جەلىلەردە قاراعاندىدا لاڭكەستىك ارەكەت جاسايمىن دەپ قاۋىپ توندىرگەن بەلگىسىز ادامنىڭ حابارى تاراپ كەتتى.
اتا-انالار بۇل جايتقا الاڭداۋشىلىق ءبىلدىرىپ جاتىر.
حابارلاما تاراتۋشى كەم دەگەندە 700 وقۋشى زارداپ شەگەدى دەپ قورقىتتى. پوليتسيا وسى جاعدايعا تۇسىنىك بەردى.
«قازىرگى ۋاقىتتا قۇزىرەتتى ورگاندارمەن بىرلەسىپ وسى اقپاراتتى تاراتقان ادامداردى انىقتاۋ بويىنشا جەدەل ءىس-شارالار ءجۇرىپ جاتىر. وقۋ ورىندارىندا قاۋىپسىزدىكتى قامتاماسىز ەتۋگە، ونىڭ ىشىندە بەينەباقىلاۋ جانە مەكتەپتەردىڭ ماڭىندا پوليتسيا ناريادتارىن ۇلعايتۋعا ەرەكشە نازار اۋدارىلدى»، - دەپ حابارلادى قاراعاندى وبلىسىنىڭ پ د.
وسىنداي جالعان حابارلاما جىل باسىنان بەرى كورشى مەملەكەت پەن قازاقستاننىڭ ءبىرقاتار قالاسىندا تارادى.
جۋىردا اقتوبە مەن پاۆلوداردا الدەبىرەۋلەر مەكتەپكە بارىپ، وقۋشىلارعا وق جاۋدىرامىز دەپ قورقىتتى.
پوليتسەيلەردىڭ ايتۋىنشا، بۇل حابارلامالار حالىق اراسىندا دۇربەلەڭ تۋعىزۋعا باعىتتالعان.
ءتارتىپ ساقشىلارى ازاماتتاردان ۇرەيگە بوي الدىرماي، سابىر ساقتاۋدى سۇرايدى.
پوليتسيا دەپارتامەنتى اتالمىش جاعداي قۇقىق قورعاۋ ورگاندارىنىڭ باقىلاۋىندا دەپ سەندىردى.
اۆتور
ايزادا اگيلبايەۆا
