قاراعاندى وبلىسىنداعى كەنتتە مال قىرىلدى
قاراعاندى. KAZINFORM - قاراعاندى وبلىسىنىڭ شاحتينسك قالاسىنا قاراستى دولينكا كەنتىندە 100 دەن استام قويدىڭ قىرىلعان. الدىن الا بولجام بويىنشا مال ۋلانعان بولۋى مۇمكىن.
الەۋمەتتىك جەلىلەردە تاراعان بەينەجازبادا دالادا جاتقان مال ولەكسەلەرى كورسەتىلگەن. كادرلار ەلدى ەلەڭ ەتكىزدى. قوي يەلەرى بولعان جاعدايعا الاڭداۋلى، ال جەرگىلىكتى بيلىك وقيعاعا قاتىستى العاشقى تۇسىنىكتەمە بەردى.
- قىرىلعان مالدىڭ بارلىعى ءبىر جەردەن سۋ ىشكەن. الدىن الا دەرەكتەرگە سايكەس، ءدال وسى سۋدان ۋلانعان بولۋى ىقتيمال. قازىر زەرتحانالىق زەرتتەۋ جۇمىستارى ءجۇرىپ جاتىر، - دەلىنگەن شاحتينسك قالاسى اكىمدىگىنىڭ رەسمي حابارلاماسىندا.
اباي اۋدانىنا قاراستى جارتاس اۋىلىنىڭ شەكاراسى، دولينكا كەنتىمەن ىرگەلەس جاتقان جەردەن 105 باس مالدىڭ ولەكسەسى تابىلدى.
جەرگىلىكتى اكىمدىك قازىرگى تاڭدا ەپيزووتيالىق جاعداي تۇراقتى ەكەنىن، مال اراسىندا اسا قاۋىپتى جۇقپالى اۋرۋلار جوق ەكەنىن حابارلادى.
- وبلىستىق ۆەتەريناريالىق قىزمەت ماماندارى ۋلانۋدىڭ جالپى وسىنداي جاعدايلاردىڭ الدىن الۋ باعىتىندا كەشەندى جۇمىس جۇرگىزىپ جاتىر. جاعداي باقىلاۋدا، - دەلىنگەن اكىمدىك مالىمدەمەسىندە.
ايتا كەتەيىك، بۇعان دەيىن قازاقستاندا اۋىل شارۋاشىلىعى جانۋارلارىنىڭ جاعدايىن ونلاين باقىلاۋعا مۇمكىندىك بەرەتىن ارنايى سمارت-جۇيە ەنگىزىلگەنى حابارلانعان بولاتىن. بۇل جۇيە مالدىڭ دەنساۋلىعىن دەر كەزىندە باقىلاۋعا، ءولىم- ءجىتىم مەن اۋرۋ بەلگىلەرىن ەرتە انىقتاۋعا مۇمكىندىك بەرەدى.
