قاراعاندى وبلىسىندا ورتا عاسىرعا ءتان بالانىڭ زيراتى تابىلدى
قاراعاندى. KAZINFORM - قاراعاندى وبلىسىنداعى نۇرا اۋدانىندا ارحەولوگتار ورتا عاسىر داۋىرىنە جاتاتىن، بۇگىنگە دەيىن بۇزىلماي ساقتالعان بالا زيراتىن انىقتادى. بىرەگەي ولجا ە. ا. بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ ەكسپەديتسياسى جۇرگىزگەن دالالىق زەرتتەۋ كەزىندە تابىلعان.
ارحەولوگتار بۇرىننان بەلگىلى «يزەندى-6» قورىمىنىڭ اۋماعىن زەرتتەۋ بارىسىندا كوزگە ىلىنبەي كەلگەن قابىردىڭ ورنىن انىقتاعان. قازبا جۇمىستارى كەزىندە اشىلعان جەرلەۋ ورنى ەجەلدەن بەرى بۇزىلماي، باستاپقى قالپىندا ساقتالعان.
قابىردەن 9-12 جاس شاماسىنداعى بالانىڭ قاڭقاسى، جەبە ۇشتارى، جىلقىنىڭ ەر-تۇرمان جابدىقتارى مەن بىلعارى قالتا تابىلدى. سونداي-اق مارقۇممەن بىرگە كومىلگەن ەرەكشە سىرعا - سۇراق بەلگىسى تارىزدەس مەتال اشەكەي - زەرتتەۋشىلەردىڭ نازارىن اۋداردى. مۇنداي سىرعالار XII- XIV عاسىرلارداعى قىپشاق تايپالارىنا ءتان اشەكەي بۇيىمداردىڭ قاتارىنان سانالادى.
انتروپولوگيالىق ساراپتاما ناتيجەسىن انتروپولوگ ايكۇمىس رايسوۆا جاريا ەتتى. وستەولوگيالىق تالداۋ بارىسىندا بالا ءتىرى كەزىندە سول جاق يىعىن سىندىرىپ العان، الايدا سۇيەك بالا كوز جۇمباس بۇرىن ءبىتىپ ۇلگەرگەنى انىقتالعان.
- مۇنداي جەرلەۋ وتە سيرەك كەزدەسەدى. قاراعاندى وڭىرىندەگى ورتا عاسىرلىق ەسكەرتكىشتەر ءالى تولىق زەرتتەلمەگەن. سوندىقتان بۇل ولجالار تاريحي تۇرعىدا دا، عىلىمي تۇرعىدا دا اسا قۇندى، - دەيدى سارىارقا ارحەولوگيالىق مۋزەيىنىڭ ديرەكتورى الەكسەي كۋكۋشكين.
زەرتحانالىق راديوكومىرتەكتى تالداۋ ناتيجەسىنە سۇيەنسەك، بالانى XII- XIII عاسىرلار ارالىعىندا جەرلەگەن. ارحەولوگتار الداعى ۋاقىتتا قوسىمشا قازبا جۇمىستارى مەن زەرتتەۋ جۇرگىزۋدى جوسپارلاپ وتىر.
- تابىلعان بۇيىمداردى سپەكترالدى تالداۋ ارقىلى زەرتتەپ، ولاردىڭ مەتالل قۇرامىن انىقتايمىز. كەيىن بارلىق ارتەفاكتى وبلىستىق تاريحي- ولكەتانۋ مۋزەيىنە تاپسىرىلادى، - دەپ ناقتىلادى كۋكۋشكين.
وسىعان دەيىن ءال-فارابي اتىنداعى قاز ۇ ۋ- دىڭ ارحەولوگيالىق ەكسپەديتسياسى ساق داۋىرىنە جاتاتىن التىن اشەكەيلەردى تاپقانى جايلى جازعان بولاتىنبىز.
