قاراعاندى وبلىسىندا اسىل تۇقىمدى جىلقىنى ۇرلاپ، سوعىمعا سويىپ العاندار ۇستالدى

قاراعاندى وبلىسىندا تازا اراب تۇقىمدى بايگە اتىن ۇرلاپ، سويىپ العان كۇدىكتىلەر ۇستالدى. ارعىماقتىڭ قۇنى 1,5 ميلليون تەڭگە تۇرادى، دەپ حابارلايدى Kazinform اگەنتتىگىنىڭ ءتىلشىسى.

قاراعاندى وبلىسى، شەت اۋداندىق پوليتسيا بولىمىنە 30 جاستاعى اۋدان تۇرعىنى ارىزدانىپ، بەلگىسىز بىرەۋلەر حالىقارالىق بايگەگە دايىنداپ جۇرگەن تۇلپارىن ۇرلاپ كەتكەنى تۋرالى حابارلاعان. جابىرلەنۋشىگە كەلتىرىلگەن شىعىن 1 ميلليون 500 مىڭ تەڭگەنى قۇراعان.

«پوليتسيا قىزمەتكەرلەرى جۇرگىزگەن كەشەندى جەدەل- ىزدەستىرۋ ءىس-شارالارى بارىسىندا وسى ىسكە قاتىسى بار دەگەن كۇدىكپەن 23 جانە 54 جاستاعى ازاماتتار ۇستالدى. ولاردىڭ بارلىعى شەت اۋدانىنداعى بلوك-بەكەتتە قولعا ءتۇستى. كۇدىكتىلەر ۇرلانعان جىلقىنى سويىپ، مۇشەلەپ تاستاعانىن جەتكىزدى. اتالعان فاكت بويىنشا قازاقستان رەسپۋبليكاسى قىلمىستىق كودەكسىنىڭ 188-1-بابىنا سايكەس قىلمىستىق ءىس قوزعالدى»، - دەپ حابارلادى قاراعاندى وبلىستىق پوليتسيا دەپارتامەنتى كريمينالدىق پوليتسيا باسقارماسىنىڭ باستىعى اسلان وسكەمبايەۆ.

باسقارما باستىعىنىڭ ايتۋىنشا، جىل باسىنان بەرى، وبلىس اۋماعىندا 644 باس مال ۇرلانىپ، ونىڭ 547 سى يەلەرىنە قايتارىلعان. مال ۇرلىعىنىڭ الدىن الۋ ماقساتىندا 13-قىركۇيەك پەن 30-جەلتوقسان ارالىعىندا وبلىس اۋماعىندا «مال ۇرلاۋشىلار» جەدەل الدىن الۋ ءىس-شاراسى وتكىزىلۋدە. ءىس-شارا اياسىندا وڭىردەگى اۆتوجولدارعا 17 جىلجىمالى بەكەتتەر قويىلدى.