قاراعاندى تاس جولىندا شامامەن 800 اۆتوكولىك كەپتەلىستە تۇرىپ قالدى
قاراعاندى. KAZINFORM - اقتۇتەك بوران سالدارىنان قاراعاندىدان استاناعا بارار تراسسا بويىندا 800-گە جۋىق كولىك كەپتەلىستە تۇرىپ قالدى، دەپ حابارلايدى Kazinform ءتىلشىسى.
قاراعاندى وبلىسىندا اۋا رايىنىڭ كۇرت ناشارلاۋىنا بايلانىستى ەكى نەگىزگى باعىت بويىنشا: قاراعاندى - استانا جانە قاراعاندى - پاۆلودار جولدارى جابىلدى.
- كۇن سايىن 10 مىڭنان استام كولىك وتەتىن رەسپۋبليكالىق ماڭىزى بار الماتى - ەكاتەرينبۋرگ اۆتوجولىندا كۇردەلى جاعداي قالىپتاستى. تەمىرتاۋ قالاسىنىڭ ماڭىنداعى تەرمينالدا جولداردىڭ جابىلۋىنا بايلانىستى شامامەن 800 اۆتوكولىك جينالىپ قالدى، - دەپ مالىمدەدى قاراعاندى وبلىسى پ د باسپا ءسوز قىزمەتى.
قاراعاندى وبلىسىنىڭ پوليتسەيلەرى جول جاعدايىن قالىپقا كەلتىرۋ ءۇشىن بارلىق قاجەتتى شارالاردى قابىلداۋدا. جاقىن ارادا اۆتوكولوننانىڭ اقمولا وبلىسىنىڭ شەكاراسىنا دەيىنگى باعىتتا قاۋىپسىز جەتۋىن قامتاماسىز ەتە وتىرىپ، ىلەسىپ ءجۇرۋ ۇيىمداستىرىلادى.
قاراعاندى وبلىسىنىڭ پوليتسيا دەپارتامەنتى ءوڭىر تۇرعىندارى مەن قوناقتارىن ەلدى مەكەندەردەن تىس جەرلەرگە اسا قاجەتتىلىكسىز شىقپاۋعا شاقىرادى. جول جاعدايى تۋرالى وزەكتى اقپارات الۋ ءۇشىن 112 قىزمەتىنىڭ حابارلامالارىن قاداعالاۋعا كەڭەس بەرىلەدى.
ەسكە سالا كەتەيىك، بۇعان دەيىن اۋا رايىنىڭ قولايسىزدىعىنا بايلانىستى بىرنەشە وبلىستا جول جابىلعانىن جازعان بولاتىنبىز.
ايزادا اگيلبايەۆا
اۆتور
