قاراعاندى ماڭىندا پوليتسيا اۆتوكولىگىنە سوعىلعان موتوسيكل جۇرگىزۋشىسى قازا تاپتى
قاراعاندى. KAZINFORM - قاراعاندى قالاسىنا جاقىن ماڭدا موتوسيكل ارنايى اۆتوكولىككە سوعىلىپ، جۇرگىزۋشى وقيعا ورنىندا كوز جۇمدى.
3-تامىز كۇنى ساعات 07:30 شاماسىندا «الماتى - ەكاتەرينبۋرگ» تاس جولىنىڭ بويىندا، قاراعاندى قالاسىنان بالقاش باعىتىنا قاراي 1 شاقىرىم جەردە جول-كولىك وقيعاسى بولدى.
قاراعاندى وبلىستىق پوليتسيا دەپارتامەنتى باستىعىنىڭ ورىنباسارى جاسقايرات قايروۆتىڭ مالىمەتىنشە، الدىن الا دەرەكتەر بويىنشا، موتوسيكل جۇرگىزۋشىسى جولدا تۇرعان Kia Sportage ماركالى ارنايى اۆتوكولىكپەن سوقتىعىسقان. سوقتىعىس سالدارىنان 42 جاستاعى ازامات العان جاراقاتتارىنان وقيعا ورنىندا جان تاپسىردى.
اتالعان دەرەك بويىنشا قىلمىستىق ءىس قوزعالىپ، ءتيىستى سوت-مەديتسينالىق جانە اۆتوتەحنيكالىق ساراپتامالار تاعايىندالدى. تەرگەۋ امالدارى جۇرگىزىلىپ جاتىر.
بۇعان دەيىن حابارلانعانداي، باس پروكۋراتۋرا قازاقستاندا جارتى جىلدا جول اپاتىنان مىڭعا تارتا ادام كوز جۇمعانىن مالىمدەگەن ەدى.
اۆتور
ايزادا اگيلبايەۆا
