قارا ەرتىسكە بەكىرە ورالدى
وسكەمەن. KAZINFORM - شىعىس قازاقستان وبلىسىنىڭ اكىمى ەرمەك كوشەربايەۆ پەن «Оst Fish»ج ش س باسشىلىعى اراسىنداعى كەزدەسۋدە زايسان-ەرتىس باسسەينىنە بەكىرە بالىعىن جىبەرۋ تۋرالى ۇسىنىس ايتىلعان.
ول ۇسىنىس دەرەۋ ىسكە اسىپ، قارا ەرتىسكە الدەقاشان جويىلىپ كەتكەن ءسىبىر بەكىرەسى جىبەرىلدى.
جەرگىلىكتى حالىق ءۇشىن دە، زايسان كولى مەن قارا ەرتىس وزەنىنىڭ ەكوجۇيەسى ءۇشىن دە ماڭىزى زور ءىس-شاراعا شىعىسقا جۇمىس ساپارىمەن كەلگەن ەكولوگيا ءمينيسترى ەرلان نىسانبايەۆ قاتىستى.
ايتا كەتەيىك، بۇل جۇمىستى وبلىسىمىزداعى بەكىرە بالىعىنىڭ ۋىلدىرىعىن جانە ەتىن وندىرۋمەن اينالىساتىن ىرگەلى كاسىپورىنداردىڭ ءبىرى «Ost Fish» ج ش س قولعا العان.
اتالعان كاسىپورىننىڭ باس ديرەكتورى ەرلان ساعيدولدين ەكولوگيا مينيسترىنە بەكىرە تۇقىمداس بالىقتاردى ءوسىرۋدىڭ ەرەكشەلىكتەرى، ولاردى قورعاۋ، جەرگىلىكتى ەكوجۇيەنى ساقتاۋ جانە باسقا دا ماسەلەلەر جونىندە بايان ەتتى.
- بۇگىندە ءبىز بەكىرەنىڭ ءۇش ءتۇرىن وسىرەمىز. ونىڭ ىشىندە ءسىبىر بەكىرەسى دە بار. بيىلعى كوكتەمدە كاسىپورنىمىزدا تەحنولوگيانى جاڭارتۋ جۇمىستارى جۇرگىزىلگەن. سونىڭ ناتيجەسىندە جىلىنا 500 مىڭعا جۋىق شاباق الۋعا بولاتىنداي ينفراقۇرىلىم قۇرىلدى. ەندى شاباقتارىمىزدى اباي، پاۆلودار جانە شىعىس قازاقستان وبلىستارىنىڭ سۋ ايدىندارىنا جىبەرۋدى جوسپارلاپ وتىرمىز، - دەپ ءمالىم ەتتى كاسىپورىن باسشىسى.
ونىڭ ايتۋىنشا، بۇگىن مارقاكول مەن زايسان اۋداندارىن ءبولىپ جاتقان قارا ەرتىس وزەنىنە ءسىبىر بەكىرەسىنىڭ ءبىر جاسار 500 داراعى جىبەرىلدى. بالىقتاردىڭ ءارقايسىنىڭ سالماعى 1,5 كەلىگە دەيىن تارتادى. دەمەك ولارعا بۇل سۋلاردى مەكەن ەتەتىن جىرتقىش بالىقتاردان كەلەر قاۋىپ جوق.
كوپپەن بىرگە ءسىبىر بەكىرەسىنىڭ تاريحي مەكەنىنە ورالۋىنا كۋا بولعان ەكولوگيا ءمينيسترى ەرلان نىسانبايەۆ بۇل وتە قۇپتارلىق باستاما ەكەنىن ايتتى. سەبەبى، ءسىبىر بەكىرەسى زايسان مەن ەرتىستى ەجەلدەن مەكەندەگەن. الايدا وتكەن عاسىردىڭ 50-60-جىلدارىنداعى سۋ ەلەكتر ستانسالارىنىڭ سالىنۋى ادەتتە ءسىبىر مەن التاي اراسىندا ورلەپ-قۇلداپ جۇرەتىن بالىقتاردىڭ جوعارى ورىستەۋىنە توسقاۋىل بولعان. ەندى مىنە، بۇل پروبلەما دا شەشىمىن تاپقانداي.
- ءسىبىر بەكىرەسىن زايسان باسسەينىنە، قارا ەرتىسكە جەرسىندىرۋدى كوزدەپ، بۇل باعىتتا باتىل ارەكەت ەتكەن ازاماتتارعا العىستان باسقا ايتارىم جوق. ەڭبەكتەرىنە تەك ساتتىلىك تىلەيمىن. مينيسترلىك تاراپىنان بۇل باستاماعا ءۇن قوسىپ، قولداۋ بىلدىرۋگە دايارمىز. بۇل باعىتتاعى جۇمىستار الداعى ۋاقىتتا جالعاسىن تاباتىن بولادى، - دەگەن ۆەدومستۆو باسشىسى قازىر بالىق وسىرەمىن دەگەندەرگە مەملەكەت تاراپىنان جان-جاقتى قولداۋ بار ەكەنىن جەتكىزدى.
اۆتور
ايدار وسپاناليەۆ
