قار ەرىدى: قوستاناي وبلىسىندا نە بولىپ جاتىر
استانا. KAZINFORM - قاردىڭ ەرۋىنە بايلانىستى سۋدىڭ ەلدى مەكەندەرگە قاراي اعۋى تىركەلدى. قۇتقارۋشىلار مەن باسقا دا قىزمەتتەر كۇشەيتىلگەن رەجيمدە جۇمىس ىستەپ جاتىر. جەرگىلىكتى ۆەدومستۆولار مالىمەتىنشە، ەشقانداي قاۋىپ جوق، دەپ حابارلايدى Kazinform ءتىلشىسى.
ماسەلەن، دەنيسوۆ اۋدانىندا، نابەرەجنوە اۋىلىنان 4 ك م قاشىقتىقتا، قاردىڭ قاتتى ەرۋىنە بايلانىستى ارشالى مەن نابەرەجنوە اۋىلدارى اراسىنداعى جەرگىلىكتى جولدان سۋ اسىپ كەتتى. ەلدى مەكەندەرگە قاۋىپ تونبەيدى، كولىك قوزعالىسى ۇزىلگەن جوق. نابەرەجنوەعا بالاما جول بار. توتەنشە جاعدايلار قىزمەتى مەن جەرگىلىكتى بيلىك ورگاندارى تاۋلىك بويى كەزەكشىلىكتە.
قوستانايدىڭ كۋناي شاعىن اۋدانىنداعى سۋ تاسقىنى جەرگىلىكتى بيلىك باقىلاۋىندا.
- ەشقانداي قاۋىپ تىركەلگەن جوق. قۇتقارۋشىلار جاعدايدى باقىلاۋ ءۇشىن درون ارقىلى اۋەدەن باقىلاۋ جۇرگىزدى، - دەپ مالىمدەدى قۇتقارۋشىلار.
قوستاناي اۋدانىنداعى جاعدايعا دا تۇسىنىك بەرىلدى. ميچۋرينو اۋىلىندا «مەليوراتور» باعباندىق بىرلەستىگىنەن قاردىڭ ەرۋى سۋدىڭ استانا جانە ۆوستوچنىي شاعىن اۋداندارىنا قاراي اعىپ كەتۋىنە سەبەپ بولعان.
- تۇرعىن ۇيلەر مەن اۋلالاردى سۋ باسۋ قاۋپى جوق. قۇتقارۋشىلار، جەرگىلىكتى بيلىك وكىلدەرى جانە پوليتسيا وقيعا ورنىندا جۇمىس ىستەپ جاتىر. ۆوستوچنىي شاعىن اۋدانىنان ەرىگەن سۋ سورىلىپ جاتىر، - دەپ اتاپ ءوتتى قىزمەت.
بۇعان دەيىن قوستاناي اۋدانىندا ەرىگەن سۋ اعىپ كەتۋى ءۇشىن اۋىلدىق جولدار اشىلعان بولاتىن.
